КХДР АҚШ-Япония-Жанубий Корея иттифоқи ва НАТОни халқаро тартиб учун “саратон” деб атади

АҚШнинг КХДР ва Россия Федерацияси ўртасидаги муносабатларга ҳужумлари Вашингтоннинг мустақил давлатларга қарши туриш учун заифлиги ва разведкаси йўқлигидан далолат беради. Бу фикрни Шимолий Корея Ташқи ишлар вазири ўринбосари Им Чхон Ир айтди.

"Қўшма Штатларнинг Корея-Россия муносабатларига нисбатан ғаразли антипатияси уларда антиимпериалистик ва мустақил давлатларга қарши туриш учун куч ва ақл йўқлигини кўрсатади", дея иддао қилган вазир ўринбосари.

Шунингдек, у АҚШ томонидан КХДР ва Россия ўртасидаги муносабатларга қаратилган душманлик қизил чизиқдан ўтганини билдирган.

"Қўшма Штатларнинг КХДР ва Россия Федерацияси ўртасидаги анъанавий дўстона муносабатлар ва ҳамкорликка нисбатан адолатсиз ва ғазабнок душманлиги, шунингдек, уларга аралашишга уриниш қизил чизиқни кесиб ўтди", дея унинг сўзларини келтиради Шимолий Кореянинг Марказий ахборот агентлиги.

Бундан ташқари, Им Чхон Ир КХДР ва Россия Федерацияси ўртасидаги муносабатлар тинчликни ҳимоя қилиш, ўзбошимчалик, ҳарбий таҳдид ва империалистларнинг аралашувини тўхтатувчи таянч эканини даъво қилган.

Им Чхон Ир ўз сўзида АҚШ-Япония-Жанубий Корея иттифоқини, шунингдек, НАТОни халқаро тартиб, тинчлик ва хавфсизлик учун “саратон” деб атаган.

Эслатиб ўтамиз, олдинроқ АҚШ Давлат котиби Энтони Блинкен Россия ва КХДР ўртасидаги ҳарбий ҳамкорлик бутун дунё учун хавф туғдираётганини билдирганди.