Ким Россия – Украина урушини муқаддас уруш деб атади

Шимолий Корея етакчиси Ким Чен Ин Россия билан қўшма ҳамкорликни кенгайтириш ва чуқурлаштириш ниятида эканини маълум қилди ҳамда Россиянинг Украинадаги урушдаги ғалабасига ишонч билдирди. Бу ҳақда Ким Чен Ин Россия Президенти Владимир Путинга йўллаган мактубида сўз очди.

Қайд этилишича , ушбу мактуб кеча, 14 сентябрь куни Шимолий Корея ташкил топганининг 78 йиллиги муносабати билан Путиннинг табригига жавоб тариқасида юборилган.

Ким Чен Ин Пхеньян ҳукумати Россия билан дўстлик, ўзаро ёрдам ва икки давлат ўртасидаги иттифоқчилик муносабатларига асосланган ҳамкорликни ҳар томонлама кенгайтириш ва чуқурлаштиришга қатъий иродага эга эканини таъкидлаган.

Шунингдек, у Россиянинг ҳозирги “мамлакат хавфсизлиги манфаатлари ва халқаро адолатни ҳимоя қилиш муқаддас уруши”да ғалаба қозонишига ишонч билдирган. Бу ибора Россиянинг Украинадаги урушига ишора сифатида баҳоланмоқда.

Шимолий Корея етакчиси Путин ва Россия халқига “ўзгармас қўллаб-қувватлови”ни ваъда қилган.

Ким Чен Ин шунингдек, Хитой раҳбари Си Цзиньпинга ҳам шунга ўхшаш мактуб йўллаган. 13 сентябрь куни Шимолий Корея марказий телеграф агентлиги эълон қилган жавоб мактубида у Шимолий Корея Хитой билан анъанавий дўстликни янада ривожлантириш ва умумий социалистик мақсадни илгари суриш учун ҳамкорлик қилишини билдирган.

Иккала мактуб ҳам Путин ва Си Цзиньпиннинг 9 сентябрь куни, Шимолий Корея ташкил топганининг 78 йиллиги нишонланган пайтда юборган табрик мактубларига жавоб бўлган.

Маълумот ўрнида, сўнгги вақтларда Москва ва Пхеньян ўртасидаги муносабатлар сезиларли даражада яқинлашди. Шимолий Корея 2024 йилда Украинада Россия қўшинлари билан бирга жанг қилиш учун ҳарбийларини юборган ва ўзаро мудофаа тўғрисидаги шартнома доирасида ҳарбий ҳамкорликни чуқурлаштирган.

Эслатиб ўтамиз, аввалроқ Россия ва Шимолий Корея Туманган дарёси орқали ўтувчи биринчи автомобиль кўпригини очганди.