Ким Чен Иннинг ўғли борлиги айтилди

Корея Халқ Демократик Республикаси етакчиси Ким Чен Иннинг тўнғич фарзанди катта эҳтимол билан ўғил бола. Бу ҳақда бугун, 7 март куни Корея Республикаси Миллий Ассамблеяси депутати Ю Сан Бом Миллий разведка хизматининг парламентдаги брифингидан сўнг маълум қилди. 

“Newsis” нашрининг парламентарийга таяниб хабар беришича, Жанубий Корея разведкасида жиддий далиллар йўқ, бироқ хорижлик ҳамкасблари билан маълумот алмашиш натижасида шундай хулосага келинган. 

Сеул маълумотларига кўра, тўнғич боланинг руҳий ва жисмоний соғлиғида ҳеч қандай муаммо йўқ – бундай тахминлар Жанубий Кореяда Ким Чен Иннинг қизининг омма олдида чиқиши туфайли юзага келмоқда. Ю Сан Бом шунингдек, КХДР етакчиси оиласида учинчи фарзанд дунёга келганини, бироқ унинг жинси номаълумлигини қўшимча қилди. 

Бундан ташқари, депутатнинг сўзларига кўра, Миллий разведка хизматининг фикрича, Ким Чжу Энинг омма олдида чиқишидан мақсад Халқ Республикаси асосчиси Ким Ир Сеннинг оиласи авлодлари ўртасидаги давомийликни мустаҳкамлаш, қизини ҳокимиятга тайёрлаш учун эмас.

“Ким Чен Ин ҳали ёш, у [ҳокимият] ворислиги режасини эрта тузиши шарт эмас”, дейди депутат.  

Ю Сан Бомнинг қўшимча қилишича, КХДР ОАВларида Ким Чен Ин ўзига ворис тайёрлаётгани ҳақида гап-сўз йўқ. 

Бундан ташқари, жанубий кореялик разведка ходимлари Ким Чжу Э уйда таълим олаётгани, таълим муассасаларига мунтазам қатнамаслиги, от миниш ва чанғи учишни яхши кўришини айтган. 

“Ким Чжу Э отни яхши миниши ҳақида маълумотлар бор, Ким Чен Ин бундан мамнун”, дейди жанубий кореялик депутат. 

Айрим маълумотларга кўра,  КХДР етакчиси от спортини яхши кўради, аввалроқ КХДР ОАВлари тегишли суратларни эълон қилган эди.