Ким Чен Ин қизи билан бирга танкда сайр қилди

КХДР етакчиси Ким Чен Ин қизи Ким Жу Э ҳамроҳлигида ҳарбий машғулотлар вақтида танкда сайр қилди. Бу ҳақда Корея марказий телеграф агентлиги хабар берди.

Ким Чен Ин Корея халқ армияси пойтахт мудофааси корпусининг ўқув базасига ташриф буюриб, пиёда ва танк бўлинмаларининг қўшма ҳужум бўйича тактик машғулотларини кузатган. Эълон қилинган суратларда у танк устида, ёнида эса қизи акс этган.

Машғулотларда махсус топшириқли бўлинмалар, зирҳли танк қўшинлари ва танк ротаси иштирок этган. Ким Чен Ин янги танк кўп йиллик ишланмалар маҳсули экани ва у замонавий ўт очишни бошқариш тизими ҳамда радиоэлектрон кураш воситалари билан жиҳозланганини маълум қилган. Унинг сўзларига кўра, бу техника армиянинг жанговар қобилиятини оширади ва жангларни, жумладан, тунги вақтда ҳам самарали олиб бориш имконини беради.

“Ишончим комилки, дунёда ушбу танк каби кучли ўзини ҳимоя қилиш функциясига эга зирҳли қурол мавжуд эмас. Шуни таъкидлаш керакки, тунги жангларда заиф бўлган зирҳли қўшинларимизнинг жанговар чекловлари бутунлай бартараф этилди. Бу катта ўзгаришдир”, дейди у.

Маълумот учун, 2022 йилдан буён Ким Жу Э отасига ишчи сафарларида мунтазам ҳамроҳлик қилиб келмоқда. ОАВ Жанубий Корея расмийларига таяниб, Ким Чен Иннинг қизи унинг вориси ролига тайёрланаётгани ҳақида хабар бериб келмоқда.

Эслатиб ўтамиз, аввалроқ Марказий телеграф агентлиги шимолий кореялик ҳарбийларнинг ўта аниқ йўналтирилган ялпи ўт очиш реактив тизимларидан фойдаланган ҳолда зарба бериш машғулотлари ҳақида хабар берганди. Унда ҳам Ким Чен Ин ва унинг қизи иштирок этган.