Хоразмда мактаб томи қулаб тушди

Ижтимоий тармоқларда Хоразм вилоятининг Қўшкўпир туманида мактаб биносининг том қисми қулаб тушгани ҳақида хабар ва видео тарқалди. Вилоят Халқ таълими бошқармаси ҳолатга расмий муносабат билдирди.

Қайд этилишича, Қўшкўпир тумани “Чаманзор” МФЙда жойлашган мазкур бино олдинги туман Политехника ва тадбиркорлик касб-ҳунар коллежига тегишли бўлиб, 2019 йилда ушбу бинода 8-сон умумий ўрта таълим мактаби ташкил қилинган.

Мактаб 540 ўринга мўлжалланган бўлиб, бугунги кунда мактабда 318 нафар ўқувчи 0,6 коэффициент билан таълим олмоқда. 

Бундан ташқари мазкур мактаб балансида 2007 йил қурилган 100 ўринли ётоқхона биноси ҳамда 1977 йилда қурилган амалиёт биноси (олдинги Автобаза балансида бўлган сўнгра коллеж балансига ўтказилган) ҳозирги кунда фойдаланилмасдан ёпиб қўйилган ёрдамчи бинолар мавжуд. 

2022 йил 29 март куни соат 14:00 лар атрофида бугунги кунда фойдаланилмасдан турган ёрдамчи бинонинг том қисмидаги 1 та дона ПНС том ёпма плитаси йиллар давомида чакка ўтиши натижасида ўпирилиб тушган. Шу куннинг ўзидаёқ туман халқ таълими бўлими томонидан Хоразм вилоят қурилиш соҳасида ҳудудий назорат инспекцияга  бинонинг техник ҳолатини ўрганиб бериш юзасидан  мурожаат қилинган.