Хоманаий Эрондан уранни олиб чиқишни тақиқлади – ОАВ

Эрон Олий раҳнамоси Мужтабо Хоманаий мамлакатдан юқори даражада бойитилган уранни олиб чиқишни тақиқловчи кўрсатма берди. Бу ҳақда “Reuters” агентлиги икки нафар юқори лавозимли эронлик манбасига таяниб хабар берди.

Агентлик суҳбатдошларидан бирига кўра, бу позицияни Эрон сиёсий элитаси ҳам тўлиқ қўллаб-қувватламоқда.

Орадан кўп ўтмай, “Al Jazeera” журналисти Али Ҳошим ўз манбасига таяниб, Х ижтимоий тармоғида Хоманаий бундай ҳужжатни имзоламаганини маълум қилди. Манба бу хабарни “тинчлик келишувига қарши томонларнинг тарғиботи” деб атаган.

Унинг айтишича, Эроннинг бойитилган уран бўйича позицияси ўзгармаган: мамлакат уни мустақил равишда суюлтиришда давом этади.

Бойитилган урандан воз кечиш Америка Қўшма Штатларининг Эрон олдига қўяётган асосий талабларидан бири ҳисобланади. Вашингтон Теҳрон ядровий дастурини тўлиқ тўхтатиши кераклигини таъкидламоқда. Эрон Ташқи ишлар вазирлиги эса бойитилган уранни учинчи давлатларга топшириш масаласи муҳокама қилинмаслигини бир неча бор билдирган.

18 май куни “Al Hadath” телеканали манбаларига таяниб, Эрон муайян шартлар асосида бойитилган уранни АҚШ ўрнига Россияга топширишга рози экани ҳақида хабар берган эди. Бу масала муҳокама қилинганини АҚШ вице-президенти Жей Ди Вэнс ҳам тасдиқлаган.

Эслатиб ўтамиз, аввалроқ Эрон маълум шартлар асосида бойитилган уранни Россияга топширишга рози бўлгани ҳақида хабар берилганди.