Хоманаий долларга қарамликни камайтириш йўлини айтди

Эрон олий раҳнамоси Оятуллоҳ Али Хоманаий бугун, 22 январь куни хусусий сектор вакиллари билан учрашув чоғида мамлакатнинг долларга қарамлигини камайтириш учун BRICS молиявий тизимини яратиш муҳимлигини таъкидлади. Бу ҳақда ИРНА хабар берди.

Унинг қайд этишича, бу чора-тадбирлар Эрон иқтисодиётининг асосий муаммоларидан бирини ҳал қилишга ёрдам беради. Хоманаий ўз нутқи давомида BRICS'га аъзо давлатлар ўртасидаги молиявий алмашинув ташқи босим ва қаттиқ иқтисодий санкциялардан азият чекаётган мамлакатдаги иқтисодий вазиятни сезиларли даражада яхшилаши мумкинлигига ишонч билдирди.

У, шунингдек, 21 январь куни хусусий сектор ютуқлари кўргазмасига ташриф буюргани ва у ерда инқирозда эришилган ютуқларни олқишлаганини айтди.

“Кўргазма мамлакат воқелигининг кичик бир қисмини акс эттирган бўлса-да, хусусий сектор ташқи босимларга қарамай, сезиларли ютуқларга эришганини кўрсатади”, деди у.

Раҳбар ўз мурожаатида ёшларни миллий ютуқлардан хабардор қилишда фаол медиа сиёсатини олиб бориш зарурлигини таъкидлади. Мамлакат эришган меҳнат самараси ва ютуқларини янада фаолроқ кўрсатиш зарурлигини таъкидлади. Эрон конституциясининг 44-моддасига асосланган иқтисодий сиёсатнинг амалга оширилишини танқидий баҳолар экан, Хоманаий уни амалга оширишдаги камчиликларга тўхталиб, бу камчиликлар сўнгги йилларда иқтисодий пасайиш сабабларидан бири бўлганини таъкидлади.

Эрон олий раҳбари ҳозирги иқтисодий вазиятни “иқтисодий уруш” деб таърифлаб, бу борада хусусий секторнинг ўрни муҳимлигини таъкидлаб, ишлаб чиқаришнинг изчил ўсиши зарурлигини энг муҳим вазифа деб эълон қилди.

Эслатиб ўтамиз, аввалроқ Россия Президенти Владимир Путинга Қозондаги BRICS саммитида давлатлараро ассоциациянинг “рамзий банкнотаси” тақдим этилганди. Давлат раҳбари “банкнот”ни Марказий банк раҳбари Элвира Набиуллинага топширди, бироқ у  “квазимипул”ни ёқтирмаганди. Россия Президенти матбуот котибининг сўзларига кўра, “BRICS банкнотаси” йиғилишнинг россиялик иштирокчиларидан бири томонидан чоп этилган. Унинг фикрича, буни Савдо-саноат палатаси вакиллари амалга оширган бўлиши мумкин.