Хива 2020 йилда туркий оламнинг маданий пойтахти деб эълон қилинади

Айни вақтда Ўзбекистон Республикаси Ташқи ишлар вазири Абдулазиз Комилов Озарбайжон пойтахти Баку шаҳрида бўлиб турибди. Комилов бошчилигидаги делегация Баку шаҳрида Туркий тилли давлатлар ҳамкорлик кенгаши (Туркий кенгаш) Ташқи ишлар вазирлари кенгашининг еттинчи йиғилишида иштирок этди. 

Озарбайжон,  Қирғизистон,  Қозоғистон,  Туркия,  Ўзбекистон ва кузатувчи-давлат Венгрия ташқи сиёсат идоралари раҳбарлари Туркий кенгаш доирасидаги ҳамкорликни ривожлантиришнинг долзарб масалаларини муҳокама қилдилар ва Туркий тилли давлатлар ҳамкорлик кенгашининг ўз ишини бошлаётган VII Саммити чоғида имзоланиши режалаштирилган ҳужжатларнинг лойиҳаларини кўриб чиқдилар. 

Ўзбекистон делегацияси раҳбари ўз нутқида Туркий кенгаш доирасида ҳамкорликни янада ривожлантиришнинг мақсад ва вазифалари борасидаги Ўзбекистон қарашларига тўхталиб ўтди. Хусусан, мамлакат савдо-иқтисодий, инвестиция ва туризм соҳаларидаги ҳамкорликни кенгайтиришдан манфаатдор экани эътироф этилди. 

2017 йилдан бошлаб Ўзбекистон Туркий кенгашнинг иштирокчи давлатлари билан икки томонлама савдо айланмасини йилига ўртача 30%га ошириб бормоқда. 5 октабрь куни Тошкент шаҳрида туркий олам вакиллари иштирокида Ишбилармонлар кенгашининг биринчи йиғилиши ва Инвестиция форуми бўлиб ўтди. 

Хива шаҳрининг 2020 йилда туркий оламнинг маданий пойтахти деб эълон қилиниши маданий-гуманитар соҳадаги алоқаларни мустаҳкамлашда муҳим аҳамиятга эга экани таъкидланди. 

Йиғилиш якунида вазирлар томонидан Туркий кенгаш фаолиятининг ташкилий-молиявий масалалари ечими, хусусан Венгрияда Туркий кенгаш ваколатхонасини очиш билан боғлиқ қатор ҳужжатлар тасдиқланди.