Хитойда Мбаппенинг футболкалари ёқиб юборилмоқда (видео)

Хитойда “Реал Мадрид” ҳужумчиси Килиан Мбаппенинг футболкалари ёқиб юборилмоқда. Бу ҳақда “EFE Noticias” хабар берди.

Хитойлик мухлислар футболчининг футболкаларини ёқиш билан бирга, унинг плакатлари ва реклама материалларини ҳам йўқ қилмоқда. Бунга Мбаппенинг яқинда Мао Цзэдунни Хитой диктатори деб атагани сабаб бўлган. 27 ёшли франциялик футболчи энг севимли меми Мао Цзэдун портрети устига ўз юзи жойлаштирилган фотоколлаж эканини айтганди.

Мбаппенинг ушбу сўзларидан кейин энергетик ичимликлар ишлаб чиқарувчи Dongpeng ва сут маҳсулотлари компанияси Mengniu футболчи билан ҳамкорликни тўхтатаётганини маълум қилди. Хитой марказий телевидениеси эса Мбаппе иштирок этадиган “Реал Мадрид” ўйинлари трансляцияларини вақтинча тўхтатди.

Юзага келган вазиятдан сўнг футболчининг ўзи, “Реал Мадрид” клуби ва Испания Ла Лигаси раҳбарияти Хитой халқидан узр сўради.

Эслатиб ўтамиз, аввалроқ Хитой Ташқи ишлар вазирлиги Килиан Мбаппенинг Мао Цзэдун ҳақидаги сўзлари учун узр сўраганини эътиборга олганлигини маълум қилганди. Бироқ бу ҳолат футболчига нисбатан бойкотнинг юмшатилишига олиб келиши номаълум.