Хитойда кунг-фуни биладиган робот ишлаб чиқилди (видео)

Хитойнинг Unitree компанияси янги H2-X гуманоид роботи акс этган видеороликни тақдим этди. Робот автомобилни пачоқлаш, баландликдан сакраш ва кунг-фу ҳаракатларини бажариш қобилиятига эга. Бу ҳақда “Naked Science” нашри хабар берди.

Видеода H2-X аввал металл чиқиндилари тўпланган майдондаги автомобиль устига чиқади. Орқага сальто қилганидан кейин тиззаси, тирсаги ва муштлари билан машинага бир неча бор зарба беради. Оқибатда автомобилнинг эшиклари ва капоти эзилади.

Шундан сўнг, робот тўрт метр баландликдаги платформадан сакрайди. Ерга тушгач, думалаб, яна оёққа туради. Кейинги кадрларда сакраб тепиш ва сальто каби ҳаракатларни бажаради. Unitree компаниясининг қайд этишича, видеода ҳақиқий синовлар акс этган ва тасвир тезлиги оширилмаган.

Роликда роботнинг қўриқлаш ва қутқарувга оид имкониятлари ҳам намойиш этилган. Бир саҳнада H2-X аёл билан қуролланган киши ўртасига ўтиб, уни чекинишга мажбур қилади. Бошқа бир эпизодда эса яқинлашиб келаётган автомобиль йўлида турган одамни итариб, четга олиб чиқади.

Яна бир саҳнада робот машина остидаги манекенни чиқариш учун автомобилнинг олд қисмини бироз кўтаради. Бу ерда бутун машинани ердан узиб кўтариш эмас, балки унинг бир қисмини кўтариш кўрсатилган.

H2-X’нинг техник хусусиятлари ҳозирча тўлиқ ошкор этилмаган. Компания маълумотларига кўра, тўлиқ қувватланган аккумулятор тахминан саккиз соат ишлашга етади. Бироқ бу кўрсаткич қайси юклама шароитида олингани аниқ эмас. Узоқ юриш ва шиддатли сакрашлар аккумулятор қувватининг тезроқ сарфланишига олиб келиши мумкин.

Таққослаш учун, оддий H2 модели сиғими 15 ампер-соат бўлган тез алмаштириладиган битта аккумулятор билан тахминан уч соат ишлайди. Янги роботда қандай аккумулятор ёки энергия тежаш ечими қўллангани ҳақида батафсил маълумот берилмаган.

Эълон қилинган маълумотларга кўра, H2-X’нинг бўйи қарийб 182 сантиметр, вазни эса 70 килограмм. Бу жиҳатдан у базавий H2 моделига мос келади.

Робот 31 та эркинлик даражасига эга. Жумладан, ҳар бир оёққа олтитадан, ҳар бир қўлга еттитадан, бел қисмига учта ва бош қисмига иккита эркинлик даражаси тўғри келади. Бу роботнинг турли бўғимлари орқали мустақил ҳаракатларни бажариш имконини беради.

H2-X минус 20 даражадан плюс 60 даражагача бўлган ҳароратда ишлашга мўлжалланган. Унинг каркасида авиация алюминийси, титан қотишмаси ва юқори мустаҳкамликдаги полимерлардан фойдаланилган.

Дастурчилар учун мўлжалланган қўшимча интерфейслар орқали роботга янги ҳаракатлар кетма-кетлигини юклаш ва патрул йўналишларини созлаш мумкин. Бироқ компания H2-X’нинг барча техник хусусиятларини ҳозирча тўлиқ эълон қилмаган.

Маржона Маманиёзова