Қишлоқдаги уйнинг бир қисми қулаб тушди. Қурбонлар бор

Хитойнинг Сичуань провинциясида оилавий тадбир вақтида уйнинг бир қисми қулаб тушди. Ҳодиса оқибатида 5 киши ҳалок бўлди, 17 киши жароҳатланди. Бу ҳақда мамлакат марказий телевидениеси хабар берди.

Қайд этилишича, ҳодиса Чаннин уездидаги Синбао қишлоғида оиланинг фарзандлари олий таълим муассасасига кирганини нишонлаш учун дастурхон ёзилган пайтда содир бўлган. Кучли ёмғирлар оқибатида тўпланган сув деворга маҳкам ўрнатилган вақтинчалик соябонга ортиқча оғирлик қилган. Оқибатда соябон девор билан бирга қулаб тушган.

Ҳалок бўлган 5 кишидан 3 нафари воқеа жойида, яна 2 нафари эса шифохонада вафот этган. Жароҳатланган 17 киши тиббий ёрдам учун шифохонага олиб борилган.

Ҳалок бўлганлар ва жароҳатланганлар орасида болалар ёки ёшлар бор-йўқлиги ҳозирча номаълум.

Билдирилишича, Сичуань провинциясида ҳафта бошида кучли ёмғирлар бўйича огоҳлантириш эълон қилинган. Расмийлар, шунингдек, ёмғирлар туфайли геологик офатлар юзага келиш хавфи юқорилигидан огоҳлантирган.

Эслатиб ўтамиз, аввалроқ “Дельфин” тайфуни сабабли Пекинда оммавий эвакуация эълон қилинганди.