Хитойда бир оиладан 11 киши ўлимга ҳукм қилинди

Хитойнинг Вэньчжоу шаҳридаги Ўрта халқ суди жиноий гуруҳнинг 11 нафар аъзосини ўлимга ҳукм қилди. Бу ҳақда AP News хабар берди.

Гуруҳ ноқонуний қимор ўйинларини ташкил қилиш ва 1,4 миллиард доллардан ортиқ пул айланмаси билан боғлиқ фирибгарлик операцияларини уюштирганликда, шунингдек, талабни бажаришдан бош тортган ходимларни ўлдиришда айбланган.

Яна беш нафар айбланувчига икки йиллик муҳлат билан ўлим жазоси берилди. Хитой суд амалиётида бундай шартли ўлим жазоси кўпинча кейинчалик умрбод қамоқ жазосига алмаштирилади. Яна 12 нафар айбланувчи беш йилдан 24 йилгача қамоқ жазосига ҳукм қилинди.

Мин оиласи аъзоларини ҳибсга олиш учун ордерлар Хитой суди томонидан 2023 йилнинг ноябрь ойида чиқарилган. Улар Мьянма билан чегарадош ҳудудларда қотиллик ва фирибгарлик схемаларини уюштирганликда гумон қилинган. Синдикатнинг жиноий фаолияти оқибатида 14 нафар ходим ҳалок бўлган.

Улардан ўн нафари фирибгарлик режасида қатнашган ва қочишга уринаётганда ёки буйруққа бўйсунмагани учун ҳалок бўлган. Мисол тариқасида 2023 йилнинг октябрь ойида содир бўлган воқеа келтирилди, унда айбланувчилар Хитойга қайтиб келмаслик учун фирибгарлик марказларидан бирида одамларга қарата ўт очган.

Эслатиб ўтамиз, аввалроқ Хитойнинг собиқ қишлоқ хўжалиги вазири Тан Жэньцзянь 29 сентябрь куни пора олгани учун икки йиллик муҳлат билан ўлим жазосига ҳукм қилинганди.