Хитой Тинч океанида ракета синовини ўтказди

Бугун, 6 июль куни Хитой ҳарбийлари атом сувости кемасидан Тинч океанига ракета учирди. Бу ҳақда “Reuters” хабар берди.

Маълумотларга кўра, Хитой Халқ озодлик армияси Ҳарбий-денгиз кучларига қарашли атом сувости кемаси маҳаллий вақт билан соат 12:01 да сохта жанговар каллак ўрнатилган ракетани учирган. Ракета режалаштирилган денгиз ҳудудига тушгани айтилган, бироқ бу ҳудуд қаерда экани очиқланмаган.

Хитой томони синов мамлакатнинг йиллик ҳарбий машғулотлари доирасидаги одатий тадбир эканини билдириб, у ҳеч бир давлат ёки муайян нишонга қарши қаратилмаганини таъкидлаган. Синов Япония, Австралия ва Янги Зеландиянинг танқидига сабаб бўлган.

Австралия Ташқи ишлар вазири Пенни Вонг Пекин ракета синови ҳақида Канберрани олдиндан хабардор қилганини тасдиқлаган. Шу билан бирга, у бу ҳаракатни минтақа барқарорлигига салбий таъсир кўрсатиши мумкин бўлган қадам деб баҳолаган.

“Бу Хитойнинг жадал ҳарбий қудратини ошираётгани, бироқ унинг мақсадлари юзасидан минтақа кутаётган даражадаги шаффофлик ва ишончни таъминламаётгани фонида юз бермоқда”, деган Вонг.

Янги Зеландия Ташқи ишлар вазири Уинстон Питерс ҳам синовдан хавотир билдирган. Унинг айтишича, Хитой мамлакатни огоҳлантирганидан бир неча соат ўтиб ракетани учирган.

“Биз, Тинч океанидаги бошқа давлатлар сингари, Хитойнинг Жанубий Тинч океанидан ракета имкониятларини синаш майдони сифатида фойдаланишидан манфаатдор эмасмиз”, деган у.

Япония ҳукумати ҳам ракета учирилиши ҳақида олдиндан хабардор қилинганини маълум қилган ва Пекинни бундай ҳаракатларни қайта кўриб чиқишга чақирган. Токио ракета мамлакатнинг эксклюзив иқтисодий зонасидан ташқарига тушганини, кемалар ва самолётларга зарар етказилгани ҳақида маълумот келиб тушмаганини билдирган.

Минтақа давлатлари танқидларига жавобан Хитой Ташқи ишлар вазирлиги вакили Мао Нин ракета синови хавфсиз, стандартларга мувофиқ ва профессионал тарзда ўтказилганини таъкидлаб, бошқа давлатларни вазиятни ортиқча талқин қилмасликка чақирган.

Эслатиб ўтамиз, аввалроқ Хитой Давлат хавфсизлик вазирлиги хорижий разведка хизматлари мамлакат сув ҳудудларини кузатиш учун сенсорлар ўрнатилган ҳайвонлардан фойдаланаётганини маълум қилгани ҳақида хабар берилган эди.