Хелайфий FIFA президенти бўлиши мумкин

ПСЖ клуби президенти Носир Ал-Хелайфий 2027 йилда бўлиб ўтиши режалаштирилган FIFA президентлик сайловида ўз номзодини қўйиши мумкин. Бу ҳақда “The Touchline” хабар берди.

Нашрга кўра, UEFA’га аъзо бир нечта миллий ассоциациялар бўлажак сайловларда амалдаги FIFA президенти Жанни Инфантинога қарши муносиб рақобатлаша оладиган ягона номзодни изламоқда. Муҳокамаларда тилга олинаётган асосий номзодлардан бири эса Франциянинг ПСЖ клуби президенти Носир Ал-Хелайфий бўлиб турибди.

Хабарларга кўра, унинг номзодини, хусусан, Бельгия ва Польша футбол федерациялари қўллаб-қувватлашга тайёр. Бироқ ҳозирча Париж клуби раҳбари расман сайловда иштирок этиш ниятини билдирмаган. Шу боис айни пайтда фақат эҳтимолий номзод ҳақида сўз бормоқда.

Шу билан бирга, Босния ва Герцеговина, Норвегия, Швеция, Германия ҳамда Испаниянинг юқори лавозимли футбол амалдорлари Европадан бошқа эҳтимолий номзодлар юзасидан ҳам музокаралар ўтказмоқда. Улар орасида Варшаванинг “Легия” клуби эгаси Дариуш Миодускининг номи ҳам тилга олинган.

Қайд этиш жоизки, АҚШ терма жамоаси ҳужумчиси Фоларин Балогунга кўрсатилган қизил карточка атрофидаги можародан сўнг Жанни Инфантино раҳбариятига нисбатан норозиликлар кучайган. Хабарларга кўра, UEFA текширув якунлари бўйича FIFA’ни ваколат доирасидан чиқиб кетганликда очиқчасига айблаган.

Бироқ Европада қаршилик кучайиб бораётган бўлса-да, Инфантинонинг мавқеи бошқа қитъа конфедерацияларининг қўллаб-қувватлаши туфайли ҳануз мустаҳкам бўлиб турибди. Шу сабабли, унга рақиб пайдо бўлиши ҳозирча FIFA президенти лавозимини йўқотишини англатмайди.