Канаданинг 51-штатга айланиши энг яхши ечим – Трамп 

north_east

Трамп нишонидагилар – Канада, Гренландия, Мексика ва Панама

АҚШ Президенти Дональд Трамп Канада мамлакатнинг 51-штатига айланиши кераклигини яна такрорлади. Бу ҳақда Трамп Суперкубок олдидан “Fox News” телеканалига берган интервьюсида сўз очди.

Унинг айтишича, Қўшма Штатлар Канада билан савдода ҳар йили 200 миллиард доллар йўқотади.

“Ўйлайманки, Канада бизнинг 51-штатимиз бўлса, яхши бўларди, чунки биз ҳар йили 200 миллиард доллар йўқотамиз. Ва мен буни давом эттиришга рухсат бермайман. Нега биз Канадани шунчалик кўп пул билан самарали субсидия қилмоқдамиз?” дея савол берди Трамп.

Шунингдек, у Канада ва Мексикадан импорт божларини тартибга солиш учун етарли қадамларни кўрмаётганини таъкидлади.

“Йўқ, бу етарли эмас. Бирор нарсани ўзгартириш керак. Бу давом эта олмайди ва мен уни ўзгартиряпман”, деб таъкидлади у.

Қайд этиш жоиз, 1 февраль куни Дональд Трамп Мексика ва Канададан олиб келинадиган маҳсулотларга 25 фоиз, Хитойдан импорт қилинадиган маҳсулотларга эса 10 фоиз божларни жорий этиш ҳақидаги фармонни имзолаганди. Канададан импорт қилинадиган энергия ресурсларига қўлланиладиган божхона божлари 10 фоизни ташкил этарди. Ушбу тарифлар Канада нефть, газ ва электр энергиясини ўз ичига олган барча энергетика тармоғига тааллуқли бўлиши керак. 2 февраль куни эса Канада ҳукумати АҚШ ҳаракатларига жавобан бугун, 4 февралдан бошлаб АҚШ маҳсулотларига ҳам 25 фоиз божхона божларини жорий этишни ва бу чора гўшт, сут ва сут маҳсулотлари, мева, сабзавот ҳамда алкоголли ичимликларни қамраб олишини маълум қилган эди.

Канада Бош вазири Жастин Трюдо АҚШ Президенти Дональд Трамп билан телефон орқали музокара ўтказиб, АҚШ томонидан жорий этилиши режалаштирилган божхона тўловларини камида 30 кунга тўхтатиш бўйича келишувга эришди.