Канадада йўловчи самолёти ағдарилиб кетди (видео)

north_east

Тайванда ҳарбий самолёт ҳалокатга учради (видео)

Delta Airlines авиакомпаниясига тегишли Bombardier CRJ900LR йўловчи самолёти Канаданинг Торонто халқаро аэропортида қўниш чоғида ағдарилиб кетди. Оқибатда 18 киши жароҳат олди. Бу ҳақда BBC хабар берди.

Қайд этилишича, самолёт бортида жами 76 йўловчи ва 4 экипаж аъзоси бўлган. Уларнинг аксарияти эвакуация қилинган ва жароҳат олмаган. Delta Connection бренди остида парвоз қилувчи Н932ХЖ рўйхат рақамига эга бўлган ушбу лайнер АҚШнинг Миннеаполис шаҳридан DL4819 рейсида учаётган бўлган. Унинг оператори Delta’нинг шўба компанияси Endeavor Air ҳисобланади.

Ҳодиса жойидан олинган кадрларда самолётнинг қор билан қопланган учиш-қўниш йўлагида ағдарилиб ётгани ва ёнида ёнғин ўчириш машиналари тургани кўринади. Шунингдек, фюзеляжнинг орқа қисмидан – двигателлар жойлашган жойдан тутун чиқаётгани қайд этилган.

Ҳодисанинг аниқ сабаби ҳозирча номаълум. Канада Транспорт хавфсизлиги бошқармаси ушбу ҳодиса бўйича тергов бошлаган. Аввалига фалокат оқибатида бир бола ва икки катта ёшли йўловчи оғир жароҳат олгани ҳақида хабарлар тарқалган. Бироқ Торонто аэропорти раҳбари Дебора Флинт матбуот анжуманида жиддий жароҳатланганлар йўқлигини маълум қилган.

“Миннеаполисдан келган Delta Air Lines самолёти қўниш чоғида ҳодисага учрагани ҳақида хабар топдик. Ҳодиса жойида фавқулодда хизматлар ишламоқда. Барча йўловчилар ва экипаж аъзолари тиббий назорат остида”, дейилади аэропорт баёнотида.

Ҳодиса сабабли Торонто аэропорти вақтинча барча рейсларни тўхтатган. Канаданинг CTV телеканали маълумотига кўра, самолёт кучли шамол сабабли қўниш вақтида ағдарилган бўлиши мумкин. Ҳодиса чоғида шамол тезлиги 32-48 км/соатни ташкил этган. Унинг шиддати 64 км/соатга ҳам етган.

Эслатиб ўтамиз, аввалроқ АҚШнинг Аризона штатидаги аэропортда икки бизнес-жет тўқнашуви оқибатида бир киши ҳалок бўлган эди. Саккиз йўловчи учун мўлжалланган Learjet 35A самолёти қўнгандан сўнг учиш-қўниш йўлагидан чиқиб кетиб, Gulfstream 200 (18 ўринли) бизнес-жети билан тўқнашган. Learjet 35A самолёти Техас штатининг Остин шаҳридан учиб келган.