Канада Бош вазири Карни жонли эфирда Трампни масхара қилди (видео)

Канада Бош вазири Марк Карни уй-жой сиёсатига бағишланган матбуот анжуманида телесуфлёр ишдан чиққанидан сўнг АҚШ Президенти Дональд Трампга кинояли муносабат билдирди. Бу ҳақда “Reuters” агентлиги хабар берди.

Қайд этилишича, матбуот анжумани вақтида телесуфлёр ишлашдан тўхтагач, Карни кулган ва Трампга киноя сифатида нутқини давом эттирган.

“Сизларга маълум қилмоқчиманки, телесуфлёр ишлашдан тўхтади. Айрим дунё етакчиларидан фарқли ўлароқ, мен буни фитна деб ҳисобламайман”, деган у.

Бу сўзлар Трампнинг ўтган йили БМТ Бош Ассамблеясидаги чиқиши пайтида эскалатор тўхтаб қолгани ва телесуфлёр ишламаганидан кейин бу ҳолат юзасидан текширув талаб қилганига ишора сифатида баҳоланган.

Карни маъмурияти ва Оқ уй бу ҳолат юзасидан агентликнинг сўровига ҳозирча расмий муносабат билдирмаган.

Маълумот учун, Канада ва АҚШ ўртасидаги муносабатлар Трамп ўтган йили Оқ уйга қайтганидан бери таранглашганди. Трамп Канадага кенг қамровли божлар жорий этган ва мамлакат АҚШнинг 51-штатига айланиши кераклигини бир неча бор таъкидлаган.

Карни эса Трампнинг савдо сиёсатига қарши курашишини билдириб, Канаданинг АҚШга дипломатик ва иқтисодий қарамлигини камайтиришга ҳаракат қилиб келмоқда. Шунингдек, у халқаро майдонда қоидаларга асосланган глобал тартиб тугаганини таъкидлаб, йирик давлатларни иқтисодий интеграцияни “қурол” сифатида қўллаётганликда танқид қилган.

Эслатиб ўтамиз, аввалроқ Германиянинг Сельм шаҳри яқинидаги фермер маккажўхори даласида Россия Президенти Владимир Путин ва АҚШ Президенти Дональд Трамп тасвирланган улкан лабиринт яратганди.