Маккажўхори даласида Путин ва Трампнинг ноодатий расми чизилди (видео)

Германиянинг Сельм шаҳри яқинидаги фермер маккажўхори даласида Россия Президенти Владимир Путин ва АҚШ Президенти Дональд Трамп тасвирланган улкан лабиринт яратди. Бу ҳақда WDR маҳаллий нашри хабар қилди.

Қайд этилишича, фермер Бенедикт Люнеман ҳар йили маккажўхори даласида турли шакллардаги лабиринтлар яратади. Бу йил у Путин ва Трампни йўргакдаги икки чақалоқ кўринишида тасвирлаган. Трампнинг қўлида Ер шарига ўхшаш тўп акс эттирилган.

Даладаги тасвирни фақат ҳаводан кўриш мумкин. Лабиринтга келган меҳмонлар учун эса қўшимча тадбирлар, жумладан, викторина ҳам ташкил этилган. Саволлардан бири “АҚШ Президенти қайси қоидаларга амал қилиши керак?” деган мазмунда бўлиб, жавоб вариантлари орасида “қонун устуворлиги”, “шовқин-сурон” ва “онасининг қоидалари” деган вариантлар келтирилган.

Фермернинг айтишича, викторина нафақат одамларни кулдириш, балки уларни ўйлашга ҳам ундаши керак. Унинг сўзларига кўра, бу орқали “ишлайдиган демократияда яшаш қанчалик яхши экани”ни эслатишни истаган.

“Янгиликларни кўрсангиз, Трамп ва Путин нималар қилаётганига кўпинча ҳайрон қоласиз”, деган Люнеман.

Билдирилишича, лабиринт Хэллоуинга қадар ташриф буюрувчилар учун очиқ бўлади.

Эслатиб ўтамиз, аввалроқ Путин ва Лукашенконинг карикатурасини чизган россиялик рассом Польшада отиб ўлдирилганди.