Putin va Lukashenkoning karikaturasini chizgan rossiyalik rassom Polshada otib o‘ldirildi

Rossiyalik rassom Semyon Skrepetskiy Polshadagi Byala-Podlyaska shahrida otib o‘ldirildi. Bu haqda “Meduza” xabar berdi.

Xabarlarga ko‘ra, voqea shahardagi turar joy majmuasi yaqinidagi avtoturargohda sodir bo‘lgan. Politsiya 44 yoshli Rossiya fuqarosi bir necha marta yaqin masofadan otib o‘ldirilganini tasdiqlagan.

Tibbiy xodimlar voqea joyiga yetib kelganida, u allaqachon vafot etgan bo‘lgan. Ma’lumotlarga ko‘ra, hujumchi jabrlanuvchiga yaqin masofadan bir necha marta o‘q uzgan. Hodisadan so‘ng politsiya shaharga kirish-chiqish yo‘llarini yopgan, maktablar va bolalar bog‘chalari qo‘riqlovga olingan.

Dastlabki ma’lumotlarga ko‘ra, jinoyatda ikki kishi ishtirok etgan bo‘lishi mumkin. Ulardan biri Belarus konsulligi yaqinida qo‘lga olingan, ikkinchi gumonlanuvchi qidirilmoqda. Ayrim norasmiy ma’lumotlarga ko‘ra, jinoyat joyiga kelishda taksi haydovchisidan foydalanilgani aytilmoqda, ammo bu hozircha rasman tasdiqlanmagan.

Semyon Skrepetskiy (asl ismi Robert Kuzovkov) Rossiyaning Oltoy o‘lkasidan bo‘lib, siyosiy karikaturalari bilan tanilgan rassom edi. U Putin, Lukashenko, Qodirov va Navalniy kabi shaxslarga hajviy rasmlar chizgan. Shuningdek, u Ukraina hukumatini ham tanqid qilgan va Mirotvorets bazasiga kiritilgani haqida ma’lumotlar bor. U 2021 yildan beri Polshada yashab ijod qilib kelgan. So‘nggi aksiyalaridan biri 12 iyunda Berlinda bo‘lgan. U Rossiya kuni munosabati bilan o‘tkazilgan norozilik tadbirida qatnashib, qo‘lida Stalin va Putin tasvirlangan karikatura bilan piket qilgan.

Skrepetskiy Aleksey Navalniy haqida kamida uchta karikatura chizgan bo‘lib, uni “Kremlning eng muvaffaqiyatli loyihasi, Rossiya muxolifatini yo‘q qilgan shaxs” deb atagan.

Bundan tashqari, u Ukraina hokimiyatini ham tanqid qilgan va shu sababli Ukraina “Mirotvorets” bazasiga kiritilgan.

Semyon Skrepetskiy “Rossiya-2028” nomli kitob muallifi. U shuningdek YouTube’da satirik videoblog yuritgan va MC Screp taxallusi ostida trap uslubida qo‘shiqlar yozgan.