Қувурдан ўтаётганида каналга тушиб кетган эркак қутқарилди (видео)

Тошкентнинг Янгихаёт туманида каналга тушиб кетган эркак сув оқимида тахминан 300 метр оқиб кетганидан кейин қутқариб қолинди. Бу ҳақда Тошкент шаҳар Фавқулодда вазиятлар бош бошқармаси хабар берди.

Қайд этилишича, ҳодиса жорий йилнинг 6 ноябрь куни соат 19:00 атрофида Жўн каналида содир бўлган. Эркак ҳар куни канал устидан ўтказилган қувур орқали ўтиб-қайтиб юрган. Бу сафар эса қувурдан ўтаётганида оёғи сирпаниб, сувга тушиб кетган.

Воқеа жойида бўлган Учтeпа тумани Фавқулодда вазиятлар бўлими қутқарувчилари оддий аскарлар – Оғабек Ғаффоров ва Отабек Абдусатторов зудлик билан ҳаракат қилиб, фуқарони чўкиб кетишдан қутқарган.

“Ҳар куни қувур устидан ўтиб-қайтардим. Кунига ўн мартача ўтаман. Шу орада йиқилиб кетдим, оёғим сирпаниб кетди”, дейди қутқарилган эркак.

Қутқарувчилар эркакнинг яқинлари билан боғланганини ва унинг ўғли Тошкентда эканини билдирган. Шунингдек, қутқарувчилар унинг Сурхондарёдаги яқинлари билан ҳам боғланганини маълум қилган.

Эслатиб ўтамиз, авварлоқ Тошкент шаҳрининг Мирзо Улуғбек туманидан ўтувчи каналда оқиб кетаётган болакай фуқаро томонидан қутқариб қолингани ҳақида хабар берилган эди.