Қўлларимиз ҳамон тепкида – Пезешкиён

Эрон Ислом Республикаси Президенти Масъуд Пезешкиён Исроил ҳужумлари оқибатида бомбардимон қилинаётган Ливан халқини қўллаб қувватлашини маълум қилди. Бу ҳақда у бугун, 9 апрель куни ўзининг Х ижтимоий тармоғидаги саҳифасида ёзди.

“Сионистик режимнинг Ливанга қарши янгиланган тажовузи дастлабки ўт очишни тўхтатиш келишувини очиқчасига бузишдир. Бундай алдамчи ҳаракатлар уларнинг келажакда ҳам музокара битимларига амал қилмаслигининг ҳавфли белгисидир.

Бу каби ҳаракатлар давом этаверса, музокараларни амалга оширишдан ҳеч қандай маъно йўқ. Қўлларимиз ҳамон тепкида. Эрон ливанлик қардошларини ҳеч қачон ёлғиз ташлаб кетмайди!” дейди Эрон Президенти.

Маълумот учун, жорий йилнинг 30 март куни Қизил Ярим Ой жамияти АҚШ ва Исроилнинг Эронга қарши ҳарбий операцияси бошланганидан бери 102 мингдан ортиқ фуқаролик объектлари ҳужумга учраганини хабар қилган. Ҳалок бўлганлар сони бир ҳафтадан кўпроқ вақт ичида 1,5 бараварга ошган.

Эслатиб ўтамиз, жорий йилнинг 7 апрель куни АҚШ Президенти Дональд Трамп Ҳормуз бўғозини тўлиқ ва зудлик билан очиш эвазига Эронга бериладиган зарбалар икки ҳафтага тўхтатилишини эълон қилган эди. Исроил АҚШни қўллаб-қувватлади, бироқ расмийлар ўт очишни тўхтатиш режими Ливанга тааллуқли эмаслигини қайд этди. Ўша куни Исроил мудофаа армияси (ЦАХАЛ) ҳарбий операция бошланганидан бери Ливандаги “Ҳизбуллоҳ” инфратузилмасига қарши энг йирик ҳужум якунланганини маълум қилди. Қўшма Штатлар ҳам Ливан ўт очишни тўхтатиш келишувига кирмаслигини билдирди. Ливанга қилинган ҳужумлардан сўнг Эрон Ҳормуз бўғозини қайтадан ёпиб қўйди.

Ҳожиакбар Муҳаммаджонов