Қозоғистонлик теннисчи “Australian Open” финалига чиқди

Бугун, 29 январь куни қозоғистонлик теннисчи Анна Данилина мавсумдаги биринчи “Катта дубулға” турнири – “Australian Open”нинг жуфтлик баҳсларида сербиялик Александра Крунич билан ҳамроҳликда турнир финалига йўл олди. 

Австралия очиқ чемпионати ярим финалда қозоқ-серб дуэти канадалик Габриэла Дабровски ва бразилиялик Луиза Стефани билан тўқнаш келишди.

Учрашув уч сет давом этди ҳамда Анна ва Александранинг 7/6 (7/2 - тай-брейк), 3/6, 6/4 ҳисобидаги ғалабаси билан якунланди.

Теннисчилар кортда 2 соат 22 дақиқа вақт сарфлашди. Бу вақт ичида қозоғистонлик ва сербиялик теннисчилар учта эйс, битта қўшхатога йўл қўйди ва 11 та брейк-поинтнинг еттитасидан унумли фойдаланди.

Шундай қилиб, қозоқ-серб дуэти Данилина ва Круниc  “Australian Open” жуфтлик баҳслари финалга чиқди. Улар ҳал қилувчи баҳсда Элисе Мертенс (Бельгия)/Чжан Шуай (Хитой) ҳамда Вера Звонарёва (Россия)/Эна Шибахара (Япония) ўртасидаги ўйин ғолиби билан тўқнаш келади.

Эслатиб ўтамиз, аввалроқ Ўзбекистон терма жамоасининг аъзоси Полина Кудерметова мусобақанинг иккинчи даврасида даниялик 23 ёшли Клара Таусонга имкониятни бой бериб, турнирдаги иштирокини якунлаган эди. Шунингдек, Ўзбекистон терма жамоасининг аъзоси Камилла Раҳимова “Australian Open” биринчи даврасида дунёнинг учинчи ракеткаси, америкалик Коко Гоффга имкониятни бой берди ва мусобақадаги иштирокини якунлаганди.