Ўзбекистоннинг иккинчи ракеткаси ўзгарди

Бугун, 2 февраль куни Халқаро аёл теннисчилар ассоциацияси (WТА) профессионал теннисчиларнинг янгиланган рейтингини эълон қилди. Унда “Australian Open” иштирокчиси Полина Кудерметова Ўзбекистонинг иккинчи ракеткасига айланди.

Янгиланган рейтингга кўра, Ўзбекистоннинг биринчи ракеткаси Камилла Раҳимова ўз ўрнини сақлаб қолди. У ҳамон рейтингда 93-ўриндан жой олган. Полина Кудерметова эса “Australian Open”даги иштирокидан сўнг рейтингдан 11 поғона юқорилаб, 139-ўрин билан мамлакатнинг иккинчи ракеткаси мақомини Мария Тимофеевадан олиб қўйди. Тимофеева рейтингда 17 поғонага пастлаб 155-ўриндан жой олди.

Дунё теннисчиларининг топ-10 талигида Австралия очиқ чемпионатидан кейин бир қатор ўзгаришлар кузатилди. Мусобақа чемпионлигини қўлга киритган қозоғистонлик Елена Рибакина 5-поғонадан 3-ўринга юқорилади. Америкалик Коко Гауфф эса 3-ўриндан 5-поғонага тушди. “Australian Open” финалида Рибакинага ютқазиб қўйишига қарамай, рейтингда ҳамон беларуслик Арина Соболенко катта фарқ билан пешқадамлик қилмоқда. Иккинчи ўриндан польшалик Ига Свёнтек жой олган.