Қора денгизда юзлаб дельфинлар нобуд бўлмоқда

Қора денгизнинг Керч бўғозида ёнилғи мойи тўкилиши ортидан бир йил ичида 688 та ўлик дельфин топилди. Дельфинларнинг ўлими яна бир неча йил давомида ошиши мумкин. Бу ҳақда Делфа сув сутемизувчиларини қутқариш илмий ва экологик маркази хабар берди.

Ташкилот маълумотига кўра, ёнилғи тўкилганидан кейинги биринчи ойда дельфинларнинг ўлими сезиларли даражада ошган. Экологик фалокат оқибатлари келгуси бир неча йил давомида сезилиши мумкин. Буларга турли касалликларнинг кўпайиши, ўлимнинг доимий юқори даражаси ва организмда токсинлар тўпланиши туфайли туғилишнинг пасайиши кузатилиши тахмин қилинмоқда.

Ташкилотнинг қўшимча қилишича, қирғоқда топилган барча дельфинлар ёнилғи мойининг тўкилишидан ўлган бўлиши мумкин эмас. Сутемизувчиларнинг ўлими сонининг кескин ошиши қирғоққа чиқиш мавсумида ҳамда октябрь охири ва ноябрь ойларида ҳам қайд этилган.

Маълумот учун, 2024 йил 15 декабрда Керч бўғозида бўрон пайтида Volgoneft-212 ва Volgoneft-239 танкерлари ағдарилиб кетган. Оқибатда бир денгизчи ҳалок бўлган. Танкерларда 9200 тонна ёнилғи мазути бўлган, шундан тахминан 2400 тонна нефть маҳсулотлари сувга тўкилган.

Бунинг ортидан 2025 йил январь ойи бошида Қора денгизда 30 дан ортиқ дельфин нобуд бўлган. Россия Табиий ресурслар вазирлигининг маълумотларига кўра, Анапанинг ёнилғи мойи билан ифлосланган пляжлари 2026 йил ёзига қадар тикланади.