Қишлоқ хўжалигидаги барча ерлар ижара ҳуқуқига ўтказилади

Ўзбекистонда 2027 йилгача қишлоқ хўжалигида фойдаланилаётган барча ерлар ижара ҳуқуқига ўтказилади. Бу ҳақда бугун, 9 сентябрь куни Президент Шавкат Мирзиёев танишган қишлоқ хўжалигида ер ресурсларидан самарали фойдаланиш бўйича таклифлар тақдимотида сўз боради. 

Қайд этилишича, охирги беш йилда ер ҳисобини юритиш бўйича янги тизим яратилган, қисқа вақтда мамлакатдаги 45 миллион гектарга яқин ер майдонидан 42 миллион гектари, яъни 94 фоизи, қишлоқ хўжалигига мўлжалланган 26 миллион гектардан зиёд ерларнинг 88,4 фоизи давлат рўйхатидан ўтказилган.

Тақдимот давомида илгари фуқаролар ва ташкилотлар фойдаланишида бўлиб, туман ҳокимликлари тасарруфига қайтарилган бўш ерларнинг ҳисобини алоҳида юритиш зарурлиги таъкидланган. Бундай ерларни қисқа муддатда аукционга чиқариш бўйича инсон омилисиз ишлайдиган тизим яратиш топширилган.

“Қишлоқ хўжалигида ерга ижара ҳуқуқини бозор активига айлантириш бўйича ишлар бошланди, ерга нисбатан қайта ижара, иккиламчи ижара институтлари киритилди”, дейилади хабарда.

Қайд этилишича, эндиликда ижарага берилган ерларни қисман қайта ижарага беришга, яъни бир қисмини ўзида олиб қолиб, қолган қисмини бошқа ижарачига ўтказишга ҳам рухсат берилади. Илгари бу учун ерни давлатга қайтариш ва янгидан аукционга чиқариш лозим эди.

2021 йилдан бошлаб қишлоқ хўжалиги ерлари фақат ижара ҳуқуқи билан ажратилмоқда. Йиғилишда 2027 йил 1 январгача қишлоқ хўжалигида фойдаланилаётган барча ерларни ижара ҳуқуқига ўтказиш лозимлиги таъкидланган.

Қишлоқ хўжалигига мўлжалланган ерларга хизмат кўрсатувчи объектлар – енгил конструкцияли музлаткичли омборхоналар, саралаш, қадоқлаш жойлари, сув тежовчи технологиялар, дала шийпони, техника парки қуришга рухсат берилади.

Бунинг учун аввал ер тузиш лойиҳаси ишлаб чиқилиб, тасдиқланади. Ушбу лойиҳа қурилишга рухсат бериш пайтида ерга бўлган ҳуқуқни тасдиқловчи ҳужжат сифатида қабул қилинади.

Бу янгилик қишлоқ хўжалигида янги имкониятларни очади, боғбон ўзи боғининг бир четида мевани сақлаш жойи, чорвадор ўз яйловининг бир қисмида чорва моллари ва чорва озуқасини сақлаш жойлари қуриш имкониятига эга бўлади.

“Давлатимиз раҳбари қишлоқ хўжалигида ижара муносабатларини янада ривожлантириш, ижарачиларнинг ҳуқуқлари ва манфаатларини ҳимоя қилиш, соҳага бозор муносабатларини янада кенг жорий этиш бўйича кўрсатмалар берди”, дейилади хабарда.

Тақдимот якунида мазкур чора-тадбирларни амалга ошириш бўйича фармон имзоланган, қонуности ҳужжатларига тегишли ўзгартиришлар киритилиши белгиланган.

Эслатиб ўтамиз, аввалроқ Президентнинг жорий йил 4 сентябрь куни қабул қилинган “Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида”ги фармони билан қишлоқ хўжалигида ҚҚСни ҳисоблашнинг соддалаштирилган тартиби жорий этилиши хабар қилинган эди.