Қирувчи самолётлар Ўзбекистон Президенти бортини кузатиб борди (видео)

Аввалроқ, Ўзбекистон Президенти Шавкат Мирзиёев расмий ташриф билан Сербияга боргани ҳақида хабар берилган эди. Мамлакат ҳаво ҳудудида унинг бортини Сербия Ҳарбий ҳаво кучларининг МиГ-29 қирувчи самолётлари кузатиб борди. 

Президент матбуот хизмати томонидан эълон қилинган видео борт ичидан олинган. Кадрнинг ўнг томонида самолётнинг қаноти кўринади. Сербиянинг МиГ-29 самолётлари эса фахрий эскортни таъминлаган ҳолда параллель ҳаракатланмоқда.

Маълумот учун, Шавкат Мирзиёев рафиқаси билан бирга расмий ташриф билан Белград шаҳрига борди. Никола Тесла номидаги халқаро аэропортда олий мартабали меҳмонларни Сербия Республикаси Президенти Александр Вучич ва унинг рафиқаси кутиб олган. Ташрифнинг асосий тадбирлари эртага бошланади. Дастурга мувофиқ, Ўзбекистон – Сербия олий даражадаги музокаралари ҳамда икки мамлакат расмийлари ва ишбилармон доиралари вакиллари иштирокида бизнес форуми ўтказилиши режалаштирилган. 

Эслатиб ўтамиз, жорий йилнинг февраль ойида Шавкат Мирзиёев давлат ташрифи билан Исломободга борганди. Ўшанда ҳам Покистон ҳаво ҳудудида олий мартабали меҳмоннинг самолётига ушбу мамлакат Ҳарбий ҳаво кучларининг қирувчи самолётлари ҳамроҳлик қилган эди.