Қирол Чарльз Эрдўған қурган масжидга борди

Буюк Британия қироли Чарльз III 2019 йилда очилган ва “Европанинг биринчи экологик тоза масжиди” номини олган Кембриж марказий масжидига бориб, мусулмонлар жамоаси вакиллари билан учрашди.

Ташриф доирасида Қирол Чарльз масжиднинг "Жамоат боғи"га ташриф буюриб, масжид жамоаси томонидан амалга оширилаётган барқарор ривожланиш амалиётлари ва ижтимоий фаолият билан танишган. 

Учрашув давомида глобал исишга қарши курашда диний жамоаларнинг роли, шунингдек, Ислом динининг Худо яратган нарсаларни ҳимоя қилиш ҳақидаги таълимоти муҳокама қилинган.

Қайд этилишича, архитектурага қизиқиши билан танилган Қирол Чарльз Буюк Британия учун ўзига хос масжид дизайнини яратиш мақсадида амалга оширилган лойиҳага қизиқиш билдирган.

У масъуллардан масжид жамоасининг ижтимоий фаолияти ва бу ташаббусларда ёшларнинг ўрни ҳақида ҳам маълумот олган.

Ташриф доирасида қирол Чарльзга профессор доктор Фуат Сезгиннинг “Ислом цивилизациясининг илмий мероси” китобининг чекланган нусхаси ва Кембриж марказий масжидининг қурилиш жараёни, унинг меъморий ечимлари ва қўлга киритилган 23 та мукофотни тавсифловчи нуфузли нашр совға қилинган. 

Қирол Чарльзнинг Кембриж марказий масжидига ташрифи Британия монархининг мусулмон ибодатхонасига асосий ташрифларидан бири сифатида тарихга кирди. Бу йўналишдаги дастлабки мисоллардан бири 2002 йилда қиролича Елизавета II нинг Сканторп масжидига ташрифи бўлган эди.

Буюк Британиянинг Кембриж шаҳрида Туркия молияси асосида қурилган ва 2019 йилда Президент Ражаб Тойиб Эрдўған иштирокида очилган Кембриж марказий масжиди “Европадаги биринчи экологик тоза масжид” сифатида эътироф этилади. 

Масжидда қуёш панеллари, ҳаво иссиқлик насослари, яшил том, табиий вентиляция тизимлари ва барқарор ривожланиш тамойиллари асосида бошқариладиган ўрмон ёғочларидан фойдаланилади. Асосан ёғоч ва мармар каби табиий материаллардан қурилган масжид, шунингдек, ноль углерод изи билан ажралиб туради.

Ёмғир суви кўчатларни суғориш ва тозалаш учун йиғилади, масжид электр энергиясининг тахминан 40 фоизи қуёш энергиясидан олинади.

Масжид томидаги ҳаво ҳароратини иссиқликка айлантирувчи тизим туфайли резервуарлардаги сув ва пол иситиш тизими иситилади. Хона ичида кислород даражаси пасайганда ёки ҳарорат кўтарилганда, датчиклар ёрдамида иссиқ ҳаво юқори бўлимлар орқали чиқариб юборилади ва тоза ҳаво берилади.

Экологик хусусиятлари туфайли деразалар масжид шифтида табиий ёруғлик олиш ва қуёш нурларини тўғридан-тўғри ичкарига қайтариш учун гумбаз шаклида жойлаштирилган.

Масжид меъморчилигида яқин атрофдаги Қироллик коллежи ибодатхонасининг елпиғичли гумбазлари ва Кембрижнинг Ромси туманида кенг тарқалган Виктория даври ғишт теришининг хочсимон нақшлари мавжуд.

Бундан ташқари, Кембриж марказий масжиди шаҳардаги молиявий қийинчиликларга дуч келган оилаларга мунтазам равишда озиқ-овқат тўпламларини етказиб беради ва саломатлик ҳақида хабардорликни ошириш бўйича тадбирлар ўтказади.

COVID-19 пандемияси даврида маҳаллий эмлаш маркази сифатида фойдаланилган масжид, шунингдек, ёшлар ўртасида кўнгилли чиқинди йиғиш каби ижтимоий ташаббуслар учун ҳам майдон ҳисобланади.

Асосан 2019 йил апрель ойида қуриб битказилган ва бир вақтнинг ўзида минг киши намоз ўқиши мумкин бўлган масжиднинг боғлари исломий анъаналарга мувофиқ лойиҳалаштирилган бўлиб, бинонинг экологик хусусиятларига ҳам устуворлик берилган.