Қирғизистон фуқароси АҚШда ноқонуний қурол экспорт қилишда гумонланиб ҳибсга олинди

north_east

Қирғизистонда катта миқдордаги қурол-яроғ омбори топилди

АҚШда ўқотар қуролларни ноқонуний экспорт қилганликда гумонланаётган қирғизистонлик қўлга олинди. Бу ҳақда АҚШ Адлия вазирлиги хабар берди.

Аниқланишича, С.Ж. исмли Қирғизистон орқали Россияга ўқотар қуролларни ноқонуний олиб чиққанликда айбланиб, АҚШда ҳибсга олинган. Айблов Бруклин федерал судига топширилган.

Маълумки, Қирғизистон фуқароси 2025 йилнинг 24 январида Лас-Вегасда ўқ отиш, овчилик ва очиқ савдо кўргазмасида қатнашган ва америкалик қурол етказиб берувчилар билан учрашган. АҚШ адвокати Жон Ж. Дуремнинг сўзларига кўра, гумонланувчи Россияга яримавтоматик қуролларни жўнатиш учун экспорт назоратини четлаб ўтиш схемасини ишлаб чиққан.

Тергов маълумотларига кўра, 2020 йилнинг март ойидан бошлаб С.Ж. АҚШ Савдо вазирлиги чекловларини бузган ҳолда Россияга Америка қуролларини етказиб бериш схемасини ташкил қилган.

Бишкек қурол компаниясининг бош директори ва эгаси сифатида у Виржиния компанияси билан Қирғизистонга қурол сотиб олиш ва экспорт қилиш учун беш йиллик 900 минг долларлик шартнома тузган. Шу билан бирга, берилган экспорт лицензиясида қуролларни Россияга реэкспорт қилиш тақиқланган. Шунга қарамай, у бошқа қирғиз компанияси орқали Россияга қурол етказиб берган. 2022 йилнинг июль ойида Қирғизистон фуқароси ўз компаниялари ўртасида 67 минг долларлик операцияларни амалга ошириб, Америка компаниясига 25 дона яримавтоматик милтиқ ва тўппонча сотиб олиш учун 65 минг доллардан ортиқ пул ўтказган. Қуроллар Жон Кеннеди номидаги халқаро аэропортдан Қирғизистонга жўнатилган. 2022 йилнинг август ойида С.Ж. милтиқлар россиялик шериклар учун мўлжаллангани ҳақида ҳужжатларни олган.

2022 йилнинг ноябрида Россия компаниясининг бош директори ЕОИИ солиқ органларига келишувни тасдиқлаб, қурол Қирғизистонда сотиб олингани ва харидор Москва компанияси эканини кўрсатди. Терговда ноқонуний операцияларни тасдиқловчи ҳужжатлар борлиги ҳам қайд этилган. Қирғизистонлик айбдор деб топилса, у 30 йилгача қамоқ жазосига ҳукм қилиниши мумкин.

Эслатиб ўтамиз, аввалроқ АҚШдан қурол сотиб олиб, Қирғизистон орқали Россияга олиб ўтмоқчи бўлган гуруҳ фаолиятига чек қўйилганди. Махсус хизматлар уч йилдан бери қурол олиб юрган Қирғизистон, Россия ва АҚШ фуқароларидан иборат гуруҳни ашёвий далиллар билан ушлаган. Улар ноқонуний равишда Glock, CZ, SIG Sauer русумли тўппончалар, AR-15, SIG Sauer 5,56-223 миллиметр калибрли автоматлар, Benelli Armi милтиқлари ва уларнинг ўқ-дориларини олиб ўтган.