Қирғизистон орқали АҚШдан Россияга қурол олиб ўтган жиноий гуруҳ қўлга олинди

АҚШдан қурол сотиб олиб, Қирғизистон орқали Россияга олиб ўтмоқчи бўлган гуруҳ фаолиятига чек қўйилди. Бу ҳақда “Sputnik” хабар берди.

Маълум қилинишича, махсус хизматлар уч йилдан бери қурол олиб юрган Қирғизистон, Россия ва АҚШ фуқароларидан иборат гуруҳни ашёвий далиллар билан ушлаган. 

Улар ноқонуний равишда Glock, CZ, SIG Sauer русумли тўппончалар, AR-15, SIG Sauer 5,56-223 миллиметр калибрли автоматлар, Benelli Armi милтиқлари ва уларнинг ўқ-дориларини олиб ўтган.

Қирғизистон Республикаси фуқароси ва бошқа шахслар Америка Қўшма Штатларидаги веб-сайтлардан ўқотар қурол сотиб олиб, уларни турли қурилмаларга яшириб, почта орқали Қирғизистонга олиб келиб, ўша ерда йиғиб, Россияга жўнатган. 

“Улар 300 дан ортиқ қурол жўнатган. Уларнинг асосий мижозлари жиноий дунё вакиллари саналади”, дейилади хабарда. 

Қўшимча қилинишича, АҚШдан навбатдаги партияни қабул қилиш чоғида қирғизистонлик фуқаро қўлга олиниб, Миллий хавфсизлик давлат қўмитасининг тергов изоляторига жойлаштирилган.

Эслатиб ўтамиз, аввалроқ Қирғизистоннинг Бишкек шаҳрида “Sun Club” деб номланган ерости казиноси фаолиятига чек қўйилганди. Аниқланишича, номаълум шахслар махсус жиҳозлардан фойдаланган ҳолда у ерда қимор ўйинларини ташкил қилган. Тезкор тадбир давомида бинода қимор ўйнаш жойлари топилган. Ташриф буюрувчилар клубнинг алоҳида хоналарида покер ўйнаган. Гумонланувчи ушланиб, вақтинча сақлаш ҳибсхонасига жойлаштирилди.