Қарши жавоб: Россия Германиянинг маданий марказларини ёпади

Россия Германиянинг мамлакатдаги Гёте институтига қарашли маданий марказларини ёпади. Москва бундай қарорни Германиянинг Россияга қарши кўрган чораларига жавоб сифатида қабул қилган. Бу ҳақда “Associated Press” хабар берди.

Қайд этилишича, Россия Ташқи ишлар вазири Сергей Лавров бугун, 3 сентябрь куни Москва, Санкт-Петербург ва Екатеринбургдаги Германиянинг маданий марказлари ёпилишини маълум қилган. Лавровнинг айтишича, Берлин Россиянинг Бонндаги консулхонаси ва Берлиндаги “Рус уйи” маданий марказини ёпишга қарор қилганидан кейин Москва ҳам худди шундай чора кўришга қарор қилган.

Унинг айтишича, Германия Россиядаги “Рус уйи”нинг ёпилиши мамлакатнинг маданий ҳузурига барҳам берилишини англатишини тушунган бўлиши керак. Лавров Москва бошқа чора кўрганида ўзини ҳурмат қилмаган бўлар эди, деган фикрни билдирган.

Мазкур қарор Россия ва Европа давлатлари ўртасида Украина уруши фонида кучайиб бораётган қарама-қаршиликлар даврида қабул қилинган.

Маълум қилинишича, Германия яқинда Лейпциг/Галле аэропортида Украина самолёти яқинидан портловчи модда билан жиҳозланган дрон топилганидан кейин Москвага қарши айбловлар билдирган. Дрон жорий йилнинг 4 август куни аниқланган ва кейин зарарсизлантирилган. Россия президенти Владимир Путин эса Германия томонининг айбловларини рад этган.

Европа давлатлари Россияни ўз ҳудудида Украинага кўмакни заифлаштириш ва мамлакатларда беқарорлик келтириб чиқаришга қаратилган саботаж ҳаракатларида айблаб келмоқда. Москва эса бу айбловларни инкор этмоқда.

Европа Иттифоқи Ташқи ишлар вазирлари ҳам Лейпциг/Галле аэропортидаги ҳодисадан кейин Россияга қандай жавоб бериш масаласини муҳокама қилган. Улар санкциялар, виза чекловлари ва Россия консулхоналарини ёпиш каби чораларни кўриб чиққан.

Шунингдек, Дания махсус хизматлари Россия томонидан мамлакат мудофаа саноатига қарши саботаж операциялари тайёрланаётгани ҳақида огоҳлантирган. Дания контрразведка хизмати маълумотларига кўра, эҳтимолий нишонлар орасида Украинага ҳарбий қисмлар етказиб берувчи мудофаа корхоналари бор.

Россия ва Европа ўртасидаги кескинлик сўнгги ойларда янада кучайган. Европа давлатлари Москва ҳаракатларини киберҳужумлар, дезинформация ва саботаж каби “гибрид уруш” воситалари билан боғламоқда. Россия эса бундай айбловларни рад этиб келмоқда.