Қариялар уйидаги ёнғинда 12 киши ҳалок бўлди (видео)

Шри-Ланканинг ғарбий қисмида жойлашган қариялар уйида кеча, 3 июнь куни юз берган ёнғин оқибатида 12 нафар фуқаро ҳалок бўлди, яна 8 киши жароҳатланди. Бу ҳақда “Associated Press” хабар берди.

Маълумотларга кўра, ёнғин кеча, 3 июнь куни кечқурун Ангуруватота шаҳридаги қариялар уйида бошланган. Полиция вакили Фредрик Вутлернинг айтишича, муассасадан 51 нафар киши қутқариб қолинган. У ерда руҳий касалликка чалинган шахслар ҳам яшаган.

Қариялар уйи директори эҳтиётсизлик оқибатида одамлар ўлимига сабаб бўлишда гумонланиб ҳибсга олинган. Ҳозирда ҳодиса юзасидан тергов олиб борилмоқда.

Хабарларга кўра, бино ички қисми деярли бутунлай ёниб кетган, мебел ва жиҳозлар куйиб кул бўлган. Ҳалок бўлганларнинг жасадлари эса бино яқинида ётган.

Ўт ўчирувчилар ёнғинни ўчириш ва унинг янада кенгайиб кетишининг олдини олиш чораларини кўрган. Қутқариб қолинган фуқаролар эса полиция ва ҳарбийлар кўмагида автобусларга жойлаштирилиб, хавфсиз ҳудудга эвакуация қилинган.

Эслатиб ўтамиз, аввалроқ Ҳиндистоннинг Нью-Деҳли шаҳри жанубидаги Малвия Нагар туманида жойлашган меҳмонхонада ёнғин юз бергани оқибатида 21 киши ҳалок бўлиб, яна 47 киши жароҳатлангани ҳақида хабар берилган эди.