“Қамчиқ“да юк машинаси ёниб кетди

Кеча, 11 апрель куни А-373 “Тошкент–Ўш” автомобиль йўлининг Қамчиқ довони қисмида “Тошкент–Водий” йўналишида ҳаракатланган Changan русумли автотранспорт воситасида ёнғин юзага келди. Бу ҳақда Фавқулодда вазиятлар вазирлиги хабар берди.

Ёнғин соат 21:53 да юзага келган. ФВВ берган хабарга кўра, оловнинг чиқишига машинанинг юкхонасида бўлган электроскутернинг қувватлагичида юзага келган қисқа туташув сабаб бўлган.

Алангани ўчириш учун воқеа жойига 2 та ёнғин-қутқарув экипажи соат 22:09 да етиб бориб, ёнғин соат 22:11 да ўраб олинган ва соат 22:12 да ёнғин тўлиқ бартараф этилган.

Ёнғин туфайли автотранспорт воситасининг салон қисми ҳамда юкхонаси ёниб зарарланган. Тезкор ҳаракатлар натижасида юкхонада бўлган 18 та велосипеддан 9 таси ва 4 та электроскутердан 1 таси ёнғиндан сақлаб қолинган. Ҳодиса оқибатида тан жароҳати олган ва ҳалок бўлганлар қайд этилмаган.

Эслатиб ўтамиз, жорий йилнинг 1 апрель куни “Қамчиқ” довонида Honda автомобилининг ҳайдовчиси бошқарувни йўқотиб, йўл четидаги тўсиққа урилганди ва кювет (хандақ)га тушиб кетганди.