Италиялик спортчи 6 та қишки Олимпиадада медаль олган илк аёлга айланди

Италиялик шорт-трекчи Арианна Фонтана қишки Олимпия ўйинлари тарихида олтита турли Олимпиадада медаль қўлга киритган биринчи аёл спортчи бўлди.

Кеча, 10 февраль куни Италияда ўтказилаётган 2026 йилги қишки Олимпия ўйинларида қисқа масофали конкида учиш бўйича илк медаллар жамланмаси ўз эгаларига топширилди. Аралаш эстафетада Италия терма жамоаси ғолиб чиқди ва жамоа сафида Арианна Фонтана олтин медални қўлга киритди.

Бу 35 ёшли спортчининг фаолиятидаги учинчи Олимпия олтин медали бўлди. Шунингдек, унинг ҳисобида тўртта кумуш ва бешта бронза медаль ҳам мавжуд.

Фонтана 2006 йилги Турин Олимпиадасидан 2026 йилги Милан–Кортина Олимпиадасигача кетма-кет олтита Олимпиадада камида биттадан медаль қўлга киритиб, тарихда бу натижага эришган биринчи аёл спортчига айланди. Шу тариқа, унинг жами Олимпия медаллари сони 12 тага етди. Шундан учтаси олтин медаль. У Олимпия ўйинлари тарихидаги энг кўп совринли шорт-трекчи бўлиб қолмоқда.

Эркаклар ўртасида шунга ўхшаш рекорд италиялик чанада учиш спортчиси Армин Цоггелерга тегишли. У 1994 йилги Лиллеҳаммер Олимпиадасидан 2014 йилги Сочи Олимпиадасигача бўлган ўйинларда иккита олтин, битта кумуш ва учта бронза медалини қўлга киритган.