Италия Исроил вазирига нисбатан тергов бошлади

Олам

−

09 Июнь visibility3225 timer2 дақиқа

Италия прокуратураси Исроилнинг миллий хавфсизлик вазири Итамар Бен-Гвирга нисбатан тергов бошлади. Тергов унинг Ғазога йўл олган гуманитар флотилия фаоллари билан боғлиқ ҳаракатлари ва уларнинг ҳибсга олиниши вақтида юзага келган ҳолатлар билан боғлиқ. Бу ҳақда ANSA агентлиги хабар берди.

Рим прокуратураси олиб бораётган тергов Бен-Гвирнинг Исроил порти Ашдодда ушлаб турилган фаолларга нисбатан муносабатини ўрганмоқда. Маълумотларга кўра, фаоллар қўллари орқага боғланган ҳолатда сақланган.

Тергов доирасида Исроил ҳукумати томонидан кемалар текшируви ва фаолларнинг ушланиши жараёнидаги кенгроқ ҳолатлар ҳам ўрганилмоқда. Ушланганлар орасида бир нечта Италия фуқаролари ҳам бўлган.

Прокуратура ишида қийноқлар ва одам ўғирлаш билан боғлиқ айбловлар ҳам кўриб чиқилмоқда.

Аввалроқ, Рим прокуратураси Исроил томонидан халқаро сув ҳудудида Ғазога йўл олган гуманитар флотилия ушлаб қолингани бўйича алоҳида тергов бошлаган эди.

Май ойида “Сумуд” номли флотилияга ҳужум пайтида Исроил денгиз кучлари кемаларни тўхтатган ва бу жараён халқаро ҳамжамиятда кенг норозиликка сабаб бўлган.

Кейинчалик тарқалган видеоларда Итамар Бен-Гвир қўлга олинган фаоллар орасида юргани, Исроил байроғини кўтаргани ва уларни масхара қилгани акс этган. Жамоатчилик босими ортидан барча фаоллар кейинчалик озод қилинган.

Эслатиб ўтамиз, аввалроқ Франция Исроилнинг Миллий хавфсизлик вазири Итамар Бен-Гвирга мамлакат ҳудудига киришни тақиқлаган эди. Париж расмийларининг бу қарори унинг Ғазога гуманитар ёрдам етказиш мақсадида йўлга чиққан “Сумуд” флотилияси иштирокчиларига нисбатан билдирган муносабати билан боғланган.

Мақола муаллифи