Исроил Сурияга ҳам авиазарбалар берди

Кеча, 3 июнь куни Исроил Мудофаа армияси жанубий Суриядаги қурол-яроғ омборларига авиазарбалар берди. Бу ҳақда Суриянинг SANA ахборот агентлиги хабар берди.

Нашрга кўра, зарбалар Даръа вилоятининг Ярмук водийсига қаратилган.

Қайд этилишича, бу зарбалар Сурия ҳудудидан Исроилга қарата отилган икки снарядга жавобан амалга оширилган. Снарядлар Исроилга учиб ўтган, бироқ аҳоли яшамайдиган ҳудудга тушган.

Исроил Мудофаа вазири Исроил Кац ушбу ҳодиса учун Суриянинг муваққат президенти Аҳмад аш-Шарани масъул деб атаган. Бироқ Суриянинг янги расмий ҳокимияти Исроилга қарата ҳеч қандай ҳужум бўлмаганини билдирган. Сурия Ташқи ишлар вазирлигининг баёнотида Исроилнинг даъволари ўрганилаётгани айтилган.

“Биз Суриядан Исроилга қарата ўқ узилгани ҳақидаги хабарларни ҳали ҳам ўрганмоқдамиз. Шу билан бирга, Суриямиз ҳеч қачон ва ҳозир ҳам Яқин Шарқдаги ҳеч бир давлатга таҳдид солмаган ва солмайди”, дейилади ушбу баёнотда.

Вазирлик Исроилнинг Сурия ҳудудидан амалга оширилган ракета ҳужумларига жавобини “Сурия суверенитетининг жиддий бузилиши” ва “минтақадаги тарангликни кучайтириш” деб атаган.

Шундай қилиб, томонлар ўртасидаги зиддият яна кескинлашмоқда, бироқ ҳодиса тафсилотлари ҳали тўлиқ аниқлаштирилмаган.

Эслатиб ўтамиз, жорий йилнинг 14 май куни АҚШ Президенти Дональд Трамп Саудия Арабистонининг Ар-Риёд шаҳрида Аҳмад аш-Шара (Абу Муҳаммад ал-Жўлоний) билан учрашганди ва унга Исроилни тан олиш ҳамда Иброҳим келишувларига қўшилиш таклифини берганди. Суриянинг янги раҳбари Трампнинг бу таклифларига қандай жавоб бергани ошкор этилмаган.