Исроил сулҳдан кейин ҳам Ғазога кенг кўламли зарбалар берди

Исроил армияси (ЦАХАЛ) ҲАМАС гуруҳининг ўт очишни тўхтатиш режимини “қўпол равишда бузганини” даъво қилиб, Ғазо секторига зарбалар берди. Бу ҳақда ЦАХАЛ матбуот хизмати хабар берди. 

Исроилнинг таъкидлашича, ҲАМАС аъзолари Миср билан чегара ҳудудидаги Рафаҳ атрофида террорчилик инфратузилмасини йўқ қилиш бўйича келишув шартларига мувофиқ ҳаракат қилаётган исроиллик ҳарбийларга ўт очган. Ҳодиса оқибатида 26 ёшли майор ва 21 ёшли катта сержант ҳалок бўлган. Армия ҲАМАС томонидан фойдаланилаётган туннеллар ҳамда бошқа ҳарбий объектларни йўқ қилиш мақсадида жавоб зарбаларини йўллашни бошлаган. 

Исроил Бош вазири Биньямин Нетаньяху ҳаракат аъзоларининг ҳарбийларга уюштирилган ҳужумдан сўнг, ЦАХАЛ ва хавфсизлик хизматига “Ғазо секторидаги террорчилик нишонларига қарши қатъий чоралар кўриш”ни буюрган.

“Times of Israel”нинг ҳарбий манбасига кўра, Рафаҳда 20 дан ортиқ нишонга зарба берган. Шунингдек, Исроил Ғазо секторига гуманитар ёрдам етказишни вақтинчага тўхтатган.

Исроил ҳукуматининг вакили ОАВга аноним тарзда берган баёнотида Тель-Авив ҳарбий ҳаракатларни қайта бошлашни истамаслигини билдирган. У ЦАХАЛ вакиллари каби авиазарбалар ҲАМАС ҳужумига жавоб бўлганини таъкидлаган ва Исроил ўт очишни тўхтатиш режимининг бузилишига худди шундай жавоб қайтариш билан огоҳлантирган.

Орадан кўп ўтмай, Исроил армияси Ғазода ўт очишни тўхтатиш режимига қайтилганини маълум қилган. ЦАХАЛ матбуот хизмати хабарига кўра, бу қарор Исроилнинг сиёсий раҳбарияти топшириғи асосида қабул қилинган.

“Исроил мудофаа армияси ўт очишни тўхтатиш шартларига риоя қилишда давом этади ва унинг ҳар қандай бузилишига кескин жавоб беради” дейилади армиянинг расмий баёнотида. 

ҲАМАС, ўз навбатида, ўт очишни тўхтатиш бўйича келишувга содиқлигини билдирган. Гуруҳнинг баёнотида айтилишича, уларнинг Рафаҳдаги кучлар билан алоқаси мавжуд эмас ва ҲАМАС раҳбарияти “бу ҳудудларда содир бўлаётган воқеаларга алоқадор ҳам эмас. 

“Al Jazeera” нашрининг тиббий манбаларга асосланиб хабар беришича, келишув кучга кирганидан бери 51 нафар фаластинлик ҳалок бўлган, яна 150 киши яраланган.

Исроил ва ҲАМАС ўртасида ўт очишни тўхтатиш бўйича келишув 10 октябрда кучга кирган эди. Томонлар бир-бирини бир неча бор уни бузишда айблаган.

13 октябрь куни АҚШ, Миср, Туркия ва Қатар етакчилари Исроил ва ҲАМАС ўртасидаги урушни тўхтатиш бўйича воситачилик қилган ҳолда, келишувни имзолади. АҚШ Президенти Дональд Трамп Яқин Шарқда “барқарор тинчлик”ка эришилганини таъкидлаган. Унинг режаси можарони ҳал этиш учун асосий сценарий сифатида белгиланган. 

Эслатиб ўтамиз, аввалроқ ҲАМАС Ғазо уруши тугагандан сўнгги ўтиш даврида ҳам минтақада хавфсизлик назоратини ўз қўлида сақлашни мўлжаллагани ҳақида хабар берганди. ҲАМАС ҳозирча қуролсизланиш бўйича аниқ мажбурият ола олмайди, бу эса АҚШнинг жанговар ҳаракатларга барҳам бериш режалари учун жиддий қийинчиликлар туғдиради.