Исроил Ғазога 15 фаластинликнинг жасадини қайтарди

Исроил томони яна 15 нафар фаластинликнинг жасадини қайтариб, Хон-Юнисдаги Носир шифохонасига топширди. Бу ҳақда ўз манбасига таяниб, “Al Jazeera” хабар берди.

Нашрга кўра, томонлар бир-бирини сулҳ шартларини бузганликда айблаётганига қарамай, жасадлар алмашинуви давом этмоқда.

Фаластинликларнинг жасадлари Исроилга ҳалок бўлган аскар Итай Ченнинг қолдиқлари топширилгандан сўнг қайтарилган. Чен 2023 йил 7 октябрда ҲАМАС томонидан асирга олинган, 2024 йил 10 март куни унинг ҳалок бўлгани маълум қилинганди.

Сулҳ кучга кирганидан бери Халқаро Қизил Хоч қўмитаси Ғазога 285 та жасадни етказиб берган. Аммо DNK таҳлил тўпламларининг етишмаслиги туфайли уларнинг шахсини аниқлаш жараёни қийинлашмоқда.

Эслатиб ўтамиз, аввалроқ Мирда Исроил ва ҲАМАС ўртасидаги сулҳ имзоланганди. Бу келишувга АҚШ, Миср, Қатар ва Туркия воситачилигида, Трампнинг 20 банддан иборат тинчлик режаси асосида эришилган.

Мазкур режа ҲАМАС томонидан барча гаровдагиларни (тирик ва ҳалок бўлганларни) озод этиш, Исроил қўшинларини келишилган чизиққача олиб чиқиш, Ғазони вақтинча бошқарувчи Тинчлик Кенгашини тузиш, хавфсизликни таъминлаш учун халқаро ҳарбий контингент жойлаштиришни назарда тутади. Шунингдек, ҲАМАС аъзолари ўз қуролларини топширса, амнистия олади.