Исроил Ғазодаги туннеллар учун гуманоид роботлар сотиб олмоқчи

Исроил армияси Ғазо секторидаги ҲАМАС туннелларида фойдаланиш учун 1 мингтагача одамсимон робот харид қилиш бўйича музокаралар олиб бормоқда. Уларни келгусида жанговар ҳаракатларга жалб этиш эҳтимоли ҳам кўриб чиқилмоқда. Бу ҳақда “Financial Times” хабар берди.

Қайд этилишича, гап АҚШнинг Foundation Future Industries стартапи томонидан ишлаб чиқариладиган Phantom русумидаги гуманоид роботлар ҳақида бормоқда. Компания АҚШ Президенти Дональд Трампнинг ўғли Эрик Трамп томонидан қўллаб-қувватланади.

Маълумотларга кўра, музокаралар компания ҳаммуассиси ва президенти Майк ЛеБланнинг баёнотларига асосланган. Ҳозирча томонлар ўртасида шартнома имзолангани ёки роботларни етказиб бериш бўйича якуний қарор қабул қилингани ҳақида маълумот йўқ. Исроил армияси ёки Мудофаа вазирлиги ҳам музокараларни расман тасдиқламаган.

Foundation Future Industries 2024 йилда ташкил этилган бўлиб, унинг бош қароргоҳи Сан-Францискода жойлашган. Компания Phantom роботларини саноат ишлари билан бирга ҳарбий мақсадларда, жумладан, логистика ва разведка вазифаларини бажариш учун ҳам таклиф қилмоқда.

Компания вакилларининг аввалги маълумотларига кўра, Phantom роботлари жорий йилда Украинада ҳам синовдан ўтказилган. Улар логистика ва разведка ишларида қўлланган, бироқ жанговар ҳаракатларда иштирок этгани ҳақида маълумот берилмаган.

Маълумот учун, Эрик Трамп компаниянинг инвестори ва бош стратегик маслаҳатчиси ҳисобланади. Бироқ унинг компаниянинг кундалик бошқаруви ёки давлат буюртмалари бўйича қарорлар қабул қилишда иштирок этмаслиги билдирилган.