Исроил Фаластинни тан олаётган Францияга кескин жавоб қайтармоқчи – “Politico”

БМТ Бош Ассамблеясининг жорий йил сентябрдаги сессиясида Франция Фаластинни тан оладиган бўлса, Исроил кескин қарши чоралар кўради. Бу ҳақда ўз манбаларига таяниб, “Politico” хабар берди.

Франция Президенти Эммануэль Макрон жорий йилнинг июль ойида яқинлашиб келаётган БМТ сессиясида Фаластинни давлат сифатида тан олинишини қўллаб-қувватлаш ниятини эълон қилган эди. Бунга жавобан Исроил Бош вазири Биньямин Нетаньяху қарши чоралар бўйича турли сценарийларни ишлаб чиқмоқда. “Politico” маълумотига кўра, эҳтимолий жавоб чоралари қаторига Иордан дарёсининг Ғарбий соҳилидаги ҳудудларни аннексия қилиш жараёнини тезлаштириш, Қуддусдаги Франция консуллигини ёпиш ва Исроил ҳудудида Францияга алоқадор объектларга, жумладан, христианларнинг Элеона муқаддас жойига киришни чеклаш киради.

Исроил Ташқи ишлар вазири ўринбосари Шаррен Хаскель аввалроқ консулликни ёпиш масаласи Бош вазир Нетаньяхунинг кун тартибида эканини тасдиқлаган. Бир европалик дипломатнинг “Politico”га маълум қилишича, Исроил “жавоб чораларида ҳеч нарсадан қайтмайди” ва мамлакатлар ўртасидаги муносабатлар кескин ёмонлашади. У, шунингдек, Эммануэль Макронни Фаластинни тан олиш жараёнининг “ҳаракатлантирувчи кучи” деб атаган, бу эса Нетаньяху билан мулоқотни қийинлаштирган.

Маълумот учун, жорий йилнинг 22 сентябрь куни Франция БМТда Фаластинни тан олишга бағишланган конференция ўтказишни режалаштирмоқда. Шунга ўхшаш позицияни Буюк Британия ҳам эгаллаган. Яъни, агар Исроил Ғазодаги ҳарбий амалиётни тўхтатмаса ва гуманитар ёрдам етказиб беришга қўйилган тўсиқларни давом эттирса, мамлакат БМТ Бош Ассамблеяси сессияси бошланишидан олдин Фаластинни тан олиш ниятида.

Бугунги кунда Фаластинни БМТга аъзо 147 давлат, жумладан, Ўзбекистон ҳам тан олган. 2024 йилда АҚШ вето ҳуқуқидан фойдаланиб, Фаластиннинг БМТга тўлақонли аъзо бўлишига йўл қўймаган. Ўшандан бери Ирландия, Норвегия, Испания ва Арманистон каби яна ўн давлат Фаластинни давлат сифатида тан олишини тасдиқлади.

Эслатиб ўтамиз, аввалроқ Испания Мудофаа вазирлиги Ғазодаги уруш фонида Исроилнинг Elbit Systems компанияси билан PULS артиллерия тизимини етказиб беришга оид 700 миллион евролик шартномани бекор қилгани ҳақида хабар берилган эди.