Испанияда футболчи рақиб билан тўқнашувдан сўнг вафот этди (видео)

Испания чемпионатининг иккинчи дивизионида иштирок этувчи “Тенерифе” клуби ҳужумчиси Хесус де Мигель рақибга қарши жиддий тўқнашувдан сўнг вафот этди. Бу ҳақда клуб матбуот хизмати хабар берди. 

“Чуқур қайғу ва бу воқеа ҳақиқат эканига ишонолмаган ҳолда “Тенерифе” футбол клуби 2026 йил 3 ноябрь куни Хесус де Мигель Аламеданинг фожиали вафот этганини эълон қилади. Юпатувчи сўзлар йўқ – бу чуқур қайғуни ҳеч нарса енгиллаштира олмайди. Биз бугун ушбу даҳшатли фожиа туфайли мотам тутаётган унинг қайғуга ботган оиласи, яқинлари ва “Тенерифе” мухлислари билан биргамиз”, дейилади клуб баёнотида.

Эслатиб ўтамиз, футболчи кеча, 2 ноябрь куни бўлиб ўтган учрашувда “Андорра” дарвозабони Хесус Овоно билан тўқнашиб кетганди. Ҳодиса оқибатида унинг юраги тўхтаб қолган. Де Мигель майдонда бир неча дақиқа давомида тиббий ёрдам олган, кейин эса шифохонага олиб кетилган. Кўрсатилган тиббий ёрдамларга қарамай футболчининг ҳаётини сақлаб қолишнинг имкони бўлмаган.

Маълумот учун, Хесус де Мигель 2025 йилдан буён “Тенерифе” сафида ўйнаб келаётганди. У фаолияти давомида “Кастельон”, “Унионистас” ва “Фуэнлабрада” клубларида ҳам тўп сурган.