Испания болаларга энергетик ичимликни тақиқламоқда

Испания ҳукумати вояга етмаганларга энергетик ичимликлар савдосини чеклаш бўйича қатъий қарор қабул қилган. Ижтимоий ҳуқуқлар вазири Пабло Бустиндуй маълум қилишича, 16 ёшга тўлмаган болаларга бундай ичимликлар сотиш тақиқланади. Кофеин миқдори 100 миллилитрда 32 миллиграммдан юқори бўлган маҳсулотлар эса 18 ёшгача бўлганларга умуман берилмайди. Бу ҳақда “Euronews” ёзди.

Қарор ўсмирлар саломатлигига оид тадқиқотлар ва жамоатчилик фикри хулосасига таянади. Озиқ-овқат хавфсизлиги агентлиги ўтказган сўров натижасига кўра, аҳолининг тўққиз нафардан саккизтаси бу чекловни қўллаб-қувватлаган. Ёшлар ўртасида ҳам қўллаб-қувватлаш даражаси юқори.

Тақиқ кенгроқ ислоҳотлар пакетининг бир қисми. Яқинда энергетик ичимликлар болаларга мўлжалланган зарарли маҳсулотлар реклама чекловлари рўйхатига киритилган эди. 2024 йилда чиқарилган мактабда овқатланиш бўйича ҳужжат эса уларни таълим муассасаларида сотишни аллақачон ман этган.

Европа Иттифоқи миқёсида ягона қонун мавжуд эмас, бироқ Литва ва Латвия аввалроқ 18 ёшгача бўлганларга савдони чеклаган. Кейинчалик Болгария, Венгрия, Польша ва Руминия ҳам турли чекловларни жорий этган. Мадриднинг янги қарори Испания бўйлаб ягона мезонни шакллантиришга қаратилган.