Исибанинг кортежи аварияга учради

Япония Бош вазири Сигэру Исибанинг машинаси унинг кортежини қўриқлаётган полиция автомобили билан тўқнашди. Бу ҳақда “Kyodo” агентлиги хабар берди.

Йўл-транспорт ҳодисаси оқибатида Бош вазир ва унинг ёрдамчилари тан жароҳати олмаган. Ҳодиса Тоттори шаҳрида, Бош вазир Токиога қайтиши учун аэропортга йўл олганида содир бўлган. Полиция автомобили светофорнинг қизил чироғида тўхтаган. Унга Бош вазирнинг автомобили келиб урилган. Кортеж ҳаракатни давом эттиргунча бир неча дақиқа воқеа жойида қолган.

Тотторида Бош вазир ҳукмрон Либерал-демократик партия фаоллари ва маҳаллий аҳоли билан учрашув ўтказган. Шу жумладан, Исиба ўз оиласи яшаган уйга ташриф буюрган. У Токиода туғилган бўлса-да, болалик ва ёшлик даврини Тотторида ўтказган. Бундан ташқари, у ота-онаси дафн этилган жойни ҳам зиёрат қилган. Бош вазир ота-онасининг қабрларини зиёрат қилиб, туғилган жойига тўхтагач, Токиога қайтиш учун Тоттори аэропортига йўл олган.

Эслатиб ўтамиз, аввалроқ Япония Бош вазирининг қанча бойлиги борлиги эълон қилинганди. Мамлакат Вазирлар Маҳкамасига кўра, Исибанинг шахсий бойлиги қарийб 33,8 млн иена (218,2 минг доллар)га тенг.