ИИБ ходимлари ногирон аёлни калтаклади(ми?)

Тошкент шаҳар Мирзо Улуғбек туманида икки нафар маҳалла инспектори бир аёлни тепиб, калтаклади. Бу ҳақда жабрланувчи аёл QALAMPIR.UZ’га маълум қилди.

Мурожаатчининг сўзларига кўра, у 1995 йилда туғилган бўлиб, пойтахтдаги нуфузли олийгоҳлардан бирида ўқитувчи сифатида фаолият юритади. Аёл биринчи турмушидан 10 йил давомида фарзанд кўрмагани сабаб ажрашган ва кейинчалик бошқа шахсга шаръий никоҳ асосида турмушга чиққан. Улар Мирзо Улуғбек тумани ТТЗ-1 маҳалласи, Буюк Ипак йўли 5-тор кўчасидаги хонадонда яшаб келган ва бу никоҳдан бир нафар фарзандли бўлган.

Бироқ аёлнинг айтишича, унда ўткир юрак етишмовчилиги кузатилиб, саломатлиги кундан кунга ёмонлашган. Шу сабабли у 2025 йил август ойида юрак амалиётини бошдан кечирган. Шундан сўнг унинг турмуш ўртоғи билан муносабатлари издан чиққан.

2025 йил декабрь ойида аёл даволаниб уйига қайтгач, доимий яшаб келган хонадонда бошқа ижарачи оила яшаётганини кўрган. Қиш фасли экани ва оиласини сақлаб қолиш мақсадида у уйга кириб, вазиятга ойдинлик киритишга уринган. Бироқ ижарачилар билан ўзаро келишмовчилик келиб чиққан. Шундан сўнг воқеа жойига участка нозирлари етиб келган. Аёлнинг таъкидлашича, жанжал ижарачилар билан эмас, балки ИИБ ходимлари билан давом этган.

Мазкур ҳолат QALAMPIR.UZ томонидан ижтимоий тармоқларда ёритилгандан сўнг Тошкент шаҳар ИИББ расмий муносабат билдирди.

Унга кўра, 2025 йил 10 декабрь куни аёл онаси ва синглиси билан ушбу хонадонга келиб, ижарада яшаётган фуқаролар билан жанжаллашган. Воқеа жойига профилактика инспекторлари А.Холиёров ва У.Хамидуллаев етиб бориб, вазиятни тинчлантиришга ҳаракат қилган.

Шу жараёнда аёл хонадон эшиги олдига ётиб олиб, уйдан кетмаслигини билдирган ва жанжални давом эттирган. Жанжалга ижарачининг отаси ҳам аралашган. Оқибатда аёлнинг онаси енгил тан жароҳати олган.

Ҳолат юзасидан аёл, унинг онаси ва синглисига нисбатан Маъмурий жавобгарлик тўғрисидаги кодекснинг тегишли моддалари асосида баённома расмийлаштирилиб, ҳужжатлар Мирзо Улуғбек тумани судига юборилган. Бироқ улар бир неча бор чақирилганига қарамай, судга келмагани қайд этилган.

Шу билан бирга, масаланинг бошқа жиҳатлари ҳам бор. Айтилишича, II гуруҳ ногирони бўлган ушбу аёл 2025 йил декабрь ойидаги воқеадан буён беш ой давомида ваколатли органларга мурожаат қилиб келмоқда. Бироқ унинг мурожаатлари етарлича ўрганилмаётгани айтилмоқда. Аёлнинг яқинлари, хусусан, отаси, ҳуқуқни муҳофаза қилувчи орган ходимлари томонидан унинг қизи калтакланганини иддао қилиб, адолат излаб юрганини билдирди.

Шу ўринда эслатиб ўтиш жоиз, “Ички ишлар органлари тўғрисида”ги қонунга мувофиқ, мазкур органларнинг асосий вазифаларидан бири фуқароларнинг ҳуқуқ ва эркинликларини ҳимоя қилишдан иборат. Шунингдек, қонунга кўра, ИИБ ходимлари ўз фаолиятини қонунийлик ва инсон ҳуқуқларига ҳурмат тамойиллари асосида амалга ошириши шарт.

Воқеа тафсилотлари билан батафсил танишиш учун QALAMPIR.UZ’нинг YouTube’даги саҳифаси орқали ушбу видеони томоша қилинг.