Инфантино Жаҳон чемпионатининг асосий фаворитини айтди

FIFA президенти Жанни Инфантино 2026 йилги Жаҳон чемпионати фаворитлари ҳақида тўхталар экан, Испания терма жамоасининг имкониятларини юқори баҳолади. Бу ҳақда Инфантино AS нашрига берган интервьюсида тўхталди.

FIFA раҳбари Испаниянинг кучли томонларини алоҳида эътироф этиб, FIFA рейтингида биринчи ўринда бораётган жамоа табиий равишда турнир фаворитига айланишини таъкидлади:

“Испания, албатта, бошқа жамоалар қатори фаворитлардан бири. Биз аллақачон Испания терма жамоасининг кучли томонларини яхши биламиз. Рейтингда биринчи ўринни эгаллаган жамоа Жаҳон чемпионатида ҳам асосий фаворитлардан бири бўлиши табиий”, дейди Жанни Инфантино.

Тарихдаги энг йирик – 48 та жамоа иштирок этадиган навбатдаги мундиал 11 июндан 19 июлгача АҚШ, Канада ва Мексика майдонларида бўлиб ўтади. Қуръа натижаларига кўра, Испания терма жамоаси “Ҳ” гуруҳидан жой олди. “Қизил фурия” гуруҳ босқичида Кабо-Верде, Саудия Арабистони ва Уругвай терма жамоаларига қарши баҳс олиб боради.

Испанияликлар гуруҳдаги иштирокини 15 июнь куни Кабо-Вердега қарши ўйин билан бошлайди. 

Маълумот учун, Испания айнан 2010 йили ҳам “Ҳ” гуруҳидан жой олиб, якунда Жаҳон чемпионлигини қўлга киритган эди.