Индонезияда “Супермен” либосидаги ўт ўчирувчи пайдо бўлди (видео)

Индонезиянинг Борнео оролида 17 ёшли Рудиянса ўрмон ёнғинларини ўчиришда “Супермен” либосида иштирок этиб, ижтимоий тармоқларда машҳур бўлди. Бу ҳақда “The Washington Post” хабар берди.

Қайд этилишича, Рудиянса отаси ташкил этган кўнгилли ўт ўчирувчилар гуруҳига қўшилган. У бир куни отасининг ёнғинни ўчиришга тайёрланаётганини кўриб, бирга боришга қарор қилган ва шундан буён Палангкарайя ҳудудидаги ёнғинларни ўчиришда отаси билан бирга иштирок этиб келади.

Маълум қилинишича, ўсмир ёнғинга чиқишда ўзининг севимли қаҳрамони “Супермен” костюмини кийиб олади. Унинг ёнғинни шланг орқали ўчираётган видеоси ижтимоий тармоқларда тарқалиб, миллионлаб марта томоша қилинган. Индонезия ўрмон хўжалиги вазири ҳам Рудиянсага эътибор қаратиб, уни “Ўрмон қаҳрамони” деб атаган.

Рудиянсанинг айтишича, у маҳаллий аҳолига ёрдам бераётганидан хурсанд. У келажакда ўрмон рейнжери бўлишни орзу қилади ва бошқа ўт ўчирувчилар ҳамда кўнгиллиларни ёнғинга қарши курашни давом эттиришга чақирган.

Йигитнинг отасига кўра, 2020 йилда гуруҳ ташкил этилганидан бери жорий мавсум энг оғир кечмоқда. Қурғоқчилик туфайли қудуқлар ва кўнгиллилар фойдаланадиган бошқа сув манбалари қуриб қолаётгани ишни янада қийинлаштирган.

Маълумот учун, Индонезияда январдан июлгача ёнғинлар 200 минг гектардан ортиқ ерни йўқ қилган. Бу Жакарта шаҳри майдонидан қарийб уч баробар катта ҳудуд бўлиб, ҳукумат ёнғинларга қарши курашиш учун қўшимча куч ва авиация жалб қилган. Ёнғинлардан чиққан тутун Индонезия, Малайзия ва Бруней ўртасида бўлинган Борнео оролининг бир қисмига тарқалган. Эль-Ниньо билан боғлиқ қурғоқчилик эса янги ёнғинлар хавфини ошириб, уларни ўчиришни қийинлаштирмоқда.