Индонезияда самолёт йўловчилари билан бирга йўқолиб қолди

Бугун, 17 январь куни Indonesia Air Transport авиакомпаниясига тегишли ATR 400 русумли самолёт Индонезиянинг Жанубий Сулавеси провинциясидаги Марос округи ҳудудида радарлар билан алоқани йўқотди. Бу ҳақда “Detik” хабар берди.

Қидирув-қутқарув хизмати оператив бўлими раҳбари Анди Султоннинг маълум қилишича, бортда жами 11 киши бўлган. Унга кўра, самолётда саккиз нафар экипаж аъзоси ва уч нафар йўловчи бўлган.

“Биз самолёт Булусараунг тоғининг чўққисига яқин ҳудудда қулаган бўлиши мумкин, деб тахмин қилмоқдамиз. У ерга ходимларимизни жойлаштирдик”, дейди Султон.

Унинг айтишича, қидирув ишларига ҳарбийлар ва полиция ходимларини ҳам ўз ичига олган қарийб 400 киши жалб этилган. Шунингдек, у қидирув ишларига ноқулай об-ҳаво жиддий тўсқинлик қилганини қайд этган.

Индонезия Транспорт вазирлиги ҳам Indonesia Air Transport авиакомпанияси томонидан эксплуатация қилинаётган самолётнинг йўқолганини ва унинг қидирув ҳудудида эканини тасдиқлаган.  

Вазирлик вакили Лукман Лаиса сўнгги маълумотларга кўра, Макассар аэропорти диспетчерлик хизмати самолётга қўниш бўйича кўрсатма берганини айтган. Қўниш жараёнида диспетчерлар самолётнинг белгиланган йўналишдан четга чиққанини аниқлаб, траекторияни тўғрилаш учун экипажга бир неча бор буйруқлар берган. Сўнгги кўрсатма узатилгач, самолёт билан алоқа узилган.

“Antara” маълумотига кўра, алоқа узилган пайтда самолёт йўқолган ҳудудда ўзгарувчан булутлилик кузатилган, кўриш масофаси эса 8 километрни ташкил этган.

Денгиз ишлари ва балиқчилик вазири Сакти Ваҳю Тренггонога кўра, ATR 42-500 бортидаги уч нафар йўловчи вазирлик ходимлари бўлиб, улар балиқчилик фаолияти устидан ҳаводан кузатув олиб бораётган бўлган.

Эслатиб ўтамиз, аввалроқ Туркияда Ливия Бош штаби бошлиғи Муҳаммад ал-Ҳаддад бўлган бизнес-жет самолёти ҳалокатга учраган эди.