Индонезияда аҳоли исён кўтарди. Қурбонлар бор (видео)

Жорий йилнинг 25 августидан бери Индонезияда бўлаётган тартибсизликлар оқибатида камида 4 киши қурбон бўлди. Бу ҳақда “Associated Press” хабар берди.

Нашрнинг ёзишича, норозилик намойишлари 25 август куни Жакартада, индонезиялик депутатлар ҳар ой уй-жой харажатлари учун компенсация олишлари ҳақидаги хабарлардан сўнг бошланган. Танқидчиларнинг айтишича, айни пайтда аҳоли нархлар, солиқлар ва ишсизликнинг ошиши билан юзлашишига тўғри келмоқда.

Кейинчалик намойишлар кенгайиб, кескинлашган. Жакартада жорий йилнинг 28 август куни норозилик акциясида курьер полиция машинаси уриб юбориши оқибатида ҳалок бўлган. Ҳокимиятнинг хабар беришича, бу воқеа бўйича 7 полициячи ҳибсга олинган ва улар сўроқ қилинмоқда.

Намойишлар ва полиция билан тўқнашувлар Медан (Шимолий Суматра), Суракарта ва Магеланг (Марказий Ява), Маланг (Шарқий Ява), Бенкулу (Суматра оролидаги Бенкулу провинцияси), Пеканбару (Суматрадаги Риау провинцияси) ва Маноквари (Ғарбий Папуа) шаҳарларида ҳам қайд этилган.

Бандунгда (Ғарбий Ява) намойишчилар маҳаллий парламент биносини ёқиб юборган, аммо жабрланганлар ҳақида хабар берилмаган. Сурабаяда (Шарқий Ява) намойишчилар тўсиқларни ёриб ўтиб, минтақавий полиция бошқармаси штабига ҳужум қилган, транспорт воситаларини ёқиб юборган. Хавфсизлик кучлари кўздан ёш оқизувчи газ ва сув пуркагичлардан фойдаланган, намойишчилар эса ёғоч таёқлар билан қаршилик кўрсатган.

Фақатгина Жакартанинг ўзида жорий йилнинг 28 август куни 951 киши ҳибсга олинган.

AP маълумотига кўра, намойишчилар кеча, 29 август куни кечқурун Жанубий Сулавеси провинцияси пойтахти Макасар шаҳрида ҳам маҳаллий парламент биносини ёқиб юборган. Бугун, 30 август куни эрталаб қутқарувчилар бинодан уч кишининг жасадини олиб чиққан. Яна беш киши куйиш ёки суяк синиши жароҳатларини олган. Улар ёнаётган бинодан деразадан сакраган.

Нашр маълумотига кўра, бугун, 30 август куни Жакартада осойишталик ҳукм сурмоқда. Фавқулодда хизматлар ёниб кетган автомобилларни йўллардан олиб ташлаш, автобус бекатлари ва полиция идораларини тозалаш билан шуғулланмоқда.

Эслатиб ўтамиз, аввалроқ Аргентина Президенти Хавьер Милей Буенос-Айрес пойтахтидан жанубда жойлашган Ломас-де-Самора шаҳрида сайловолди тадбир чоғида тошбўрон қилингани ҳақида хабар берилган эди.