Имомали Раҳмон Россия разведкасига “кўрсатган каромати учун” раҳмат айтди
Олам
−
21 Ноябрь 2023
14335Тожикистон Президенти Имомали Раҳмон Россия ҳуқуқ-тартибот идоралари ва махсус хизматларига ҳамкорлик учун алоҳида миннатдорлик билдирди. У бу ҳақда бугун, 21 ноябрь куни Москвада Россия Президенти Владимир Путин билан ўтган учрашувлардан сўнг матбуот ходимларига гапирган.
“Мамлакатларимизнинг хавфсизлик соҳасидаги ўзаро ҳамкорлигини таъкидлаб, Россия Федерацияси ҳуқуқ-тартибот идоралари ва разведка хизматларига уларнинг яхши мувофиқлаштирилган фаолияти ва Тожикистоннинг тегишли идоралари билан ўзаро ҳамкорлиги учун алоҳида миннатдорлик билдирмоқчиман”, деган Тожикистон Президенти.
Унинг қўшимча қилишича, икки давлат терроризм, экстремизм, радикализм кўринишлари, наркотик моддалар контрабандаси, кибержиноятчилик ва трансчегаравий уюшган жиноятчиликнинг бошқа турларига қарши курашишда яқиндан ҳамкорлик қилади.
“Музокаралар чоғида биз БМТ, МДҲ, ШҲТ, КХШТ ва бошқа халқаро ва минтақавий бирлашмалар доирасида ўзаро ҳамкорликни кучайтириш тарафдори эканимизни билдирдик”, дейди Тожикистон раҳбари.
Раҳмон Россия ва Тожикистон ҳудудлари ўртасидаги ҳамкорлик географиясини кенгайтириш икки давлат ўртасидаги савдо ва бошқа соҳалардаги муносабатларни ривожлантиришга хизмат қилишини, шунингдек, халқлар дўстлигини мустаҳкамлашга хизмат қилишини қўшимча қилди.
“Биз минтақалараро алоқаларни ривожлантириш ва мустаҳкамлашга катта аҳамият берамиз. Бугунги кунда Россиянинг 80 дан ортиқ федерал ва хўжалик субъектлари Тожикистон билан ҳамкорлик қилмоқда. Минтақалараро алоқалар географиясининг янада кенгайиши мамлакатларимиз ўртасидаги савдо-иқтисодий ва бошқа соҳалардаги алоқаларни ривожлантиришга хизмат қилади, деб ҳисоблаймиз. Бу халқларимиз ўртасидаги дўстлик ва ўзаро англашувни мустаҳкамлашга ҳам хизмат қилишига ишонаман”, дейди у.