Илон Маск “Википедия”нинг муқобил вариантини эълон қилди

Илон Маск “Википедия” муқобилининг бета-версиясини эълон қилди. “Грокипедия” икки ҳафтадан кейин ишга туширилади. Бу ҳақда у ўзининг X саҳифасида ёзди.

Tesla ва SpaceX асосчиси Grok сунъий интеллект платформаси томонидан қувватланадиган “Грокипедия” муқобил онлайн энциклопедиясини ишга туширмоқда. Унинг таъкидлашича, янги платформа “мавжуд энциклопедиядан сезиларли даражада яхшироқ ва барча фойдаланувчилар учун чекловларсиз фойдаланилиши мумкин”.

Қайд этилишича, 2024 йилда Илон Маск “Википедия” асосчиларини сиёсий тарафкашликда айблаган ва уни Dickipedia деб ўзгартириш учун 1 миллиард доллар тўлашни таклиф қилган.

Унинг сўзларига кўра, анъанавий “Википедия”дан фарқли ўлароқ, “Грокипедия” “ҳақиқат энциклопедияси” – матнларни автоматик таҳлил қиладиган, фактлар тўғрилигини текширадиган ва материалларга “тўғри”, “қисман тўғри” ёки “нотўғри” деб белги қўядиган тизимга айланишни мақсад қилган.

Эслатиб ўтамиз, аввалроқ “Википедия”ни бошқарадиган нотижорат ташкилот Wikimedia жамғармаси энг кўп ташриф буюрилган саҳифаларнинг йиллик рўйхатини эълон қилганди. “Википедия” АҚШ сиёсати ҳақидаги сўровлардан тортиб, Ҳиндистондаги крикетгача бўлган мавзуларда бутун дунё бўйлаб миллионлаб одамлар учун маълумот манбаига айланиб улгурган.  

Моҳичеҳра Қадамова