Илон Маск OpenAI’ни ҳам ўзиники қилмоқчи

Илон Маск бошчилигидаги инвесторлар консорциуми OpenAI’ни назорат қилувчи нотижорат ташкилотни 97,4 миллиард долларга сотиб олиш бўйича таклиф берган. Бу ҳақда Илон Маскнинг адвокати Марк Тобероффга таяниб, “The Wall Street Journal” хабар берди.

“OpenAI’ни ўз илдизларига – очиқлик ва хавфсизликка қайтариш вақти келди. Биз буни таъминлаймиз”, деган Илон Маск. 

Консорциум таркибига Valor Equity Partners, Baron Capital, Атреидес Management, Vy Capital, 8ВC каби инвестицион киради. Келишув амалга ошса, Илон Маскнинг xAI компанияси OpenAI билан бирлаштирилиши мумкин.

OpenAI бош директори Сэм Альтман Маскнинг таклифига тезда жавоб берган.

“Йўқ, раҳмат, лекин агар хоҳласангиз, биз Twitter’ни 9,74 миллиард долларга сотиб олишга тайёрмиз”, деб ёзган у Х саҳифасида.

OpenAI ҳаммуассиси бўлган Илон Маск 2018 йилда Сэм Альтман билан келишмовчиликлар сабаб компанияни тарк этган. Шундан бери OpenAI ва Илон Маск ўртасидаги баҳслар давом этмоқда. “Financial Times”нинг OpenAI’га яқин манбасига кўра, Маскнинг нотижорат ташкилотни сотиб олиш бўйича таклифи PR-ҳаракат бўлиши мумкин. Бунга жавобан, Маскнинг таклифига алоқадор манба OpenAI’ни бу фикрни исботлашга чақирган.

Сэм Альтман ҳозирда OpenAI ни тижорат ташкилотига айлантириш ва бошқарувни назорат қилувчи нотижорат ташкилотни ажратиш жараёнида. OpenAI вакили Жейк Тобероффнинг таъкидлашича, нотижорат ташкилот раҳбарлик ҳуқуқидан маҳрум қилинаётгани учун адолатли компенсация олиши зарур.

Илон Маск OpenAI'нинг дастлабки асосчиларидан бири сифатида компаниянинг тижорат тузилмасига ўтиши унинг бошланғич миссиясига зид эканини айтиб келмоқда. Ўтган йили у OpenAI, Сэм Альтман ва компания президенти Грег Броcкманга қарши судга мурожаат қилган ва уларга шартномани бузиш ҳамда нохолис иш юритишда айблов қўйган. Маскнинг даъво аризасида айтилишича, OpenAI тузилишига оид дастлабки келишувга кўра, компания нотижорат ташкилот сифатида умумий сунъий интеллект устида ишлаши ва технологияни очиқ манба сифатида тақдим этиши кўзда тутилган.

Жорий йил январь ойида Жейк Тоберофф Делавер ва Калифорния бош прокурорларини OpenAI’ни нотижорат ташкилотни сотиш учун очиқ аукцион ўтказишга мажбурлашга чақирди. Бироқ OpenAI бундай жараённи бошлашга мажбур эмас ва ҳозирда компания 260 миллиард долларлик баҳолаш асосида инвестиция жалб қилиш босқичида. FT манбаларига кўра, OpenAI нотижорат ташкилотнинг баҳосини 30 миллиард доллар атрофида муҳокама қилган, аммо Маск вакиллари бу қиймат анча юқори бўлиши кераклигини таъкидламоқда. Маск компанияга ўнлаб миллион доллар инвестиция қилган ва нотижорат ташкилотнинг юқори баҳоланиши унга катта даромад келтириши мумкин.

OpenAI дастлаб 2015 йилда нотижорат тадқиқот лабораторияси сифатида ташкил этилган, аммо 2020 йилда тижорий бўлимни ишга туширган. Юқорида қайд этилганидек, Маск 2018 йилда компаниянинг директорлар кенгашидан чиқиб кетган.

Эслатиб ўтамиз, 2022 йил 25 апрель куни Twitter (ҳозирги X) раҳбарлари Илон Маскнинг ижтимоий тармоқни сотиб олиш бўйича 44 миллиард долларлик таклифини қабул қилганини эълон қилган эди. Шундан буён X’га Илон Маск эгалик қилиб келмоқда.